या पठ्ठ्याने चोरली चक्क मंदिरातील दानपेटी अन्....

लांजा (रत्नागिरी ) : मंदिरातील दानपेटी जंगलात नेऊन फोडून रोख रक्कम चोरणाऱ्या चोरट्याला पोलिसांनी अटक केल्याची घटना पूनस-कोंड येथे घडली आहे. या चोरट्याला बुधवारी न्यायालयात हजर केले असता दोन दिवसांची पोलिस कोठडी सुनावली आहे. मंगेश मनोहर पत्याने (वय ३०, रा. पूनस कोंड), असे संशयिताचे नाव आहे.
पोलिसांनी दिलेली माहिती अशी, की पूनस कोंड येथे ब्राम्हण देवाचे देऊळ आहे. या देवळामध्ये लोखंडी दानपेटी होती. शिमगोत्सवाला ही दानपेटी उघडण्यात येते. साधारण वर्षाकाठी या दानपेटीमध्ये दहा हजारांचे दान जमा होते. 

हेही वाचा- रत्नागिरीत २२ लाखांच्या खुर्ची घोटाळ्याचा पर्दाफाश...

पूनस कोंड येथील मंगेश मनोहर पत्याने (वय ३०) हा काहीच काम धंदा करीत नसल्याने व त्याला दारूचे व्यसन असल्याने त्याला आर्थिक चणचण होती. मंगेशने गुरुवारी रात्री मंदिरातील दानपेटी चोरली व जंगलात नेऊन फोडली. त्यातील रोख रक्कम पळविली. दुसऱ्या दिवशी म्हणजे शुक्रवारी हा प्रकार उघडकीस आल्यानंतर वाडीमध्ये चर्चा होती. 

 हेही वाचा- मुंबईच्या या चिमुकलीचा शिमगोत्सव ठरला अखेरचाच....

मंगेशने दिली उडवाउडवीची उत्तरे ​
दरम्यान, मंगेश हा कामधंदा करत नसल्याने त्याच्याकडे पैसे आले कुठून असा प्रश्‍न येथील ग्रामस्थांना पडला होता. वाडीची बैठक झाली. त्यावेळी देखील मंगेशने उडवाउडवीची उत्तरे दिली. शिमगोत्सवाला चाकरमानी गावी आल्यानंतर या चोरीविषयी पुन्हा खुलासा करण्यासाठी पुन्हा बैठक घेण्यात आली; परंतु काहीच तोडगा न निघाल्याने अखेर पूनस कोंड येथील ग्रामस्थांनी सोमवारी सायंकाळी लांजा पोलिस ठाण्यात मंगेशविरोधात फिर्याद दिली. विजय भिकाजी लाखण या ग्रामस्थांनी फिर्याद दिली. त्यानंतर मंगेशला रात्री उशिरा अटक झाली. बुधवारी मंगेशला न्यायालयात हजर केले असता दोन दिवसांची पोलिस कोठडी सुनावली आहे.