घंटा वाजणार; विद्यार्थी शाळेत जाणार

चिपळूण : राज्य सरकारने ४ ऑक्टोबरपासून पाचवी ते बारावी दरम्यानच्या शाळा सुरू करण्यास मान्यता दिली आहे. तालुक्यात पाचवी ते बारावीदरम्यान ३१ हजार ७०० विद्यार्थी शिक्षण घेत आहेत. शाळा सुरू होण्यापूर्वी इमारती सुसज्ज ठेवण्याच्या सूचना पंचायत समितीच्या गटशिक्षणाधिकाऱ्यांनी शिक्षकांना दिल्या आहेत.

तालुक्यात जिल्हा परिषदेच्या पहिली ते सातवीच्या १४८ तर पहिली ते चौथीच्या २२४ शाळा आहेत तसेच खासगी शिक्षणसंस्थांच्या पहिली ते बारावीदरम्यान १४, पाचवी ते सातवीदरम्यान ७ आणि आठवी ते दहावीदरम्यान २४ शाळा आहेत. तालुक्यात एकूण आठ कनिष्ठ महाविद्यालय आहेत. संबंधित पाचवी ते बारावी दरम्यानच्या शाळा सुरू करण्यासाठी पालकांचे संमतीपत्र घेतले जात आहे तसेच शाळांमध्ये फवारणी करण्यासाठी देखील ग्रामपंचायती व शाळांना सूचना देण्यात आल्या आहेत.

कोरोनाच्या पार्श्‍वभूमीवर गेल्या काही महिन्यांपासून बंद असलेल्या जिल्हा परिषद व माध्यमिक शाळा अद्याप सुरू झालेल्या नाहीत. कोरोनाचे सावट कमी झाल्यानंतर या शाळा सुरू करण्याचा निर्णय राज्य शासनाने घेतला. त्यानुसार ४ ऑक्टोबरपासून शाळा सुरू करण्याचे निर्देश देण्यात आले आहेत. तालुक्यात ४७ जिल्हा परिषद शाळांच्या इमारती नादुरुस्त होत्या. गेल्या काही महिन्यांत या इमारतींचे दुरुस्तीचे कामकाज सुरू आहे. मात्र, दुरुस्तीअभावी विद्यार्थ्यांना इमारतीत बसण्याची गैरसोय होणार नाही, याची दक्षता प्रत्येक शाळेने घेतली असल्याची माहिती गटशिक्षण अधिकारी दादासाहेब ईरणाक यांनी दिली.

पाहणी करण्याचे निर्देश

शाळा सुस्थितीत आहेत की नाहीत, याची पाहणी करण्याचे निर्देश केंद्रप्रमुख तसेच विस्तार अधिकारी यांना देण्यात आले आहेत. गेल्या काही दिवसांपासून या शाळांची पाहणी झाली नसल्याची माहिती गटशिक्षणाधिकारी यांनी दिली. त्यामुळे दीर्घ कालावधीनंतर शाळेची घंटा वाजणार आहे.

जिल्हा परिषद शाळेत विद्यार्थी संख्या

1. पहिली ते चौथी शिक्षण घेणारे विद्यार्थीः १४ हजार

2. पहिली ते बारावी दरम्यानः ४५ हजार ७४१

3. पाचवी ते बारावी दरम्यानः ३१ हजार ७०७