संस्कृत विद्यापीठाचे पहिले उपकेंद्र रत्नागिरीत

रत्नागिरी : रामटेक, नागपूर येथील कविकुलगुरू कालिदास संस्कृत विश्वविद्यालयाच्या रत्नागिरी उपकेंद्राचा उद्‍घाटन समारोह उद्या (ता. २५) येथे होणार आहे. या केंद्राचे उद्‍घाटन मुख्यमंत्री उद्धव ठाकरे यांच्या प्रमुख उपस्थितीत आभासी माध्यमातून होणार आहे. कार्यक्रमाला पालकमंत्री अॅड. अनिल परब आणि उच्च व तंत्र शिक्षणमंत्री उदय सामंत उपस्थित राहणार आहेत.

हा कार्यक्रम उद्या दुपारी १२ वाजता एसटी स्टॅंडसमोरील अरिहंत संकुल येथे होणार आहे. कविकुलगुरू कालिदास विश्वविद्यालयाचे कुलगुरू श्रीनिवास वरखेडी कार्यक्रमाचे अध्यक्षस्थान भूषवतील. कुलसचिव डॉ. हरेकृष्ण अगस्ती, वित्त व लेख अधिकारी डॉ. रामचंद्र जोशी, गुरुकुलचे संचालक प्रा. पराग जोशी आणि रत्नागिरी उपकेंद्राचे संचालक डॉ. दिनकर मराठे विशेषत्वाने उपस्थित राहतील.

उद्‍घाटन कार्यक्रमाला खासदार विनायक राऊत, खासदार सुनील तटकरे, यांच्यासह सर्व आमदार, जिल्हा परिषदेचे अध्यक्ष विक्रांत जाधव, नगराध्यक्ष प्रदीप तथा बंड्या साळवी, मुख्य सचिव सीताराम कुंटे आणि प्रधान सचिव विकासचंद्र रस्तोगी, जिल्हाधिकारी डॉ. बी. एन. पाटील, जि. प. मुख्य कार्यकारी अधिकारी डॉ. इंदुराणी जाखड, पोलीस अधीक्षक डॉ. मोहितकुमार गर्ग, राज्य उच्च शिक्षण संचालनालयाचे संचालक धनराज माने हे सुद्धा उपस्थित राहणार आहेत. या कार्यक्रमाला आभासी उपस्थित राहावे, असे आवाहन विश्वविद्यालयाचे कुलसचिव डॉ. हरेकृष्ण अगस्ती आणि रत्नागिरी उपकेंद्राचे संचालक डॉ. दिनकर मराठे यांनी केले आहे.

मंत्री सामंत यांचा पुढाकार

महाराष्ट्र कार्यक्षेत्र असलेल्या या विद्यापीठाच्या चढत्या आलेखाला व सर्वांगीण विकासाला अधिक गती मिळाली. उच्च व तंत्र शिक्षणमंत्री उदय सामंत यांनी केलेल्या विद्यापीठाच्या चार उपकेंद्रांच्या घोषणेमुळे एकमेव संस्कृत विद्यापीठाचे पहिले उपकेंद्र रत्नागिरीत सुरू होत आहे. एसटी स्टॅंडसमोरील संकुलात उपकेंद्र उभारले जात आहे. सुरवातीला २० हजार चौरस फुटांहून अधिक परिसरात संगणक लॅब, डिजिटल क्लासरूम यांसह योग कक्ष आदी अनेक सोयींनी सज्ज असे उपकेंद्र आकार घेत आहे. लवकरच उपकेंद्राचे स्वतंत्र भवनही साकार होणार आहे.