‘माझे आजोळ’चे भरत भोगटेंना आदर्श समाजसेवक पुरस्कार

72469
भरत भोगटे

‘माझे आजोळ’चे भरत भोगटेंना
आदर्श समाजसेवक पुरस्कार
ओरोस, ता. १ ः बॅ. नाथ पै सेवांगण, कट्टा शाखेतर्फे प्रा. मधू दंडवते जन्मशताब्दी प्रारंभानिमित्त देण्यात येणारा बापूभाई शिरोडकर स्मृती आदर्श समाज सेवक पुरस्कार ‘माझे आजोळ’ वृद्धाश्रमाचे प्रमुख भरत भोगटे यांना जाहीर झाला. २१ जानेवारीला दुपारी तीनला प्रा. मधू दंडवते यांच्या जन्मशताब्दी प्रारंभ कार्यक्रमावेळी या पुरस्काराचे वितरण होणार आहे.
भोगटे हे मूळ मसुरे गावचे असून मुंबईतील जुन्या पिढीतील काँग्रेसचे नेते रमेश भोगटे यांचे सुपुत्र आहेत. बँक ऑफ इंडियामधून निवृत्त झाल्यावर त्यांनी पत्नी व मुलगीच्या स्मृतीप्रित्यर्थ तिरवडे (ता.मालवण) येथे वृद्धांसाठी सहजीवन प्रकल्प सुरू केला. जीवनातील एकटेपणाचा कटू अनुभव गाठीशी बांधीत त्यांनी दुसऱ्याच्या आनंदातून आपला आनंद शोधण्याचा प्रयत्न केला आणि त्यातून साकारले ‘माझे आजोळ’. कोणताही व्यावसायिक दृष्टीकोन न ठेवता एक अभिनव प्रकल्प त्यांनी साकारला. यासाठी त्यांचे बंधू किशोर भिसे यांनी तिरवडे येथील जागा विनामूल्य दिली. प्रमुख सहकारी विजय पोतदार यांचेही सहकार्य लाभले. ज्येष्ठ बांधवाच्या आनंदात ते आपला आनंद मानतात. भोगटेंच्या कार्याचा गौरव करण्यासाठी हा पुरस्कार त्यांना प्रदान करण्यात येणार आहे. याआधी विविध पुरस्कार त्यांना प्राप्त झाले आहेत. पुरस्कार वितरण सोहळ्यास उपस्थित राहाण्याचे आवाहन पुरस्कार निवड समिती व कट्टा सेवांगणच्या वतीने किशोर शिरोडकर, विकास म्हाडगुत, श्याम पावसकर, बापू तळवडेकर यांनी केले आहे.