रत्नागिरी- विज्ञान संकल्पनेवर कार्य करण्यास सहकार्य

पान २ साठी

विज्ञान संकल्पनेवर कार्य करण्यास सहकार्य
शिल्पा पटवर्धन; गोगटे महाविद्यालयात तंत्रज्ञान क्षेत्रातील महिला दिन
सकाळ वृत्तसेवा
रत्नागिरी, ता. २० ः विज्ञानक्षेत्रातील कोणतेही कार्य करण्यास इच्छुक असणाऱ्या गोगटे-जोगळेकर महाविद्यालयातील प्राध्यापिकेने आपली संकल्पना मांडली तर त्यांना पूर्ण सहकार्य देऊ. प्रापंचिक अडचणींना तोंड देतही आपल्याला सुंदर कार्य करता येते आणि ती शक्ती महिलांमध्ये नक्कीच आहे. प्रत्येकाने ती ओळखली पाहिजे आणि तिची जाणीव होऊन आपण त्या शक्तीचा पुरेपूर वापर केला पाहिजे, असे प्रतिपादन रत्नागिरी एज्युकेशन सोसायटीच्या कार्याध्यक्षा शिल्पा पटवर्धन यांनी केले. गोगटे-जोगळेकर महाविद्यालयात प्रथमच आयोजित विज्ञान आणि तंत्रज्ञान क्षेत्रातील महिला दिन कार्यक्रमात त्या बोलत होत्या.
महिला व विद्यार्थिनी यांचे विज्ञान आणि तंत्रज्ञान क्षेत्रातील योगदानाचे महत्व सर्वांना ज्ञात व्हावे व इतर महिलांना यातून प्रोत्साहन मिळावे याकरिता हा दिन साजरा केला जातो. विज्ञान शाखेच्या उपप्राचार्या डॉ. अपर्णा कुलकर्णी यांच्या संकल्पनेतून, प्राचार्यांच्या पुढाकाराने आणि शिल्पाताईंच्या अधिपत्याखाली कार्यक्रमाचे आयोजन केले.
डॉ. अपर्णा कुलकर्णी यांनी शिक्षणापासून ते विज्ञानशाखेचे उपप्राचार्य व एक पीएच.डी. गाईड म्हणून झालेला प्रवास मांडला. महाविद्यालयाच्या विज्ञान शाखेमध्ये ५० टक्क्यांपेक्षा जास्त महिला कार्यरत असून त्या यशाची उत्तुंग शिखरे सर करत आहे. त्याप्रीत्यर्थ सर्वांचे त्यांनी अभिनंदन केले. कार्यक्रमास प्राचार्य डॉ. प्रफुल्लदत्त कुलकर्णी उपस्थित होते. महिला प्राध्यापिका, पीएच.डी. गाईड, विभागप्रमुख, उपप्राचार्य अशी एकेक शिखरे पादाक्रांत करत आहेत त्याबद्दल त्यांचे अभिनंदन केले आणि त्यांच्यापासून प्रेरणा घेऊन प्रत्येकीने आपले योगदान हे विज्ञान आणि तंत्रज्ञान क्षेत्राला दिले पाहिजे, असे सांगितले.
प्रा. डॉ. मधुरा मुकादम, डॉ. सोनाली कदम, डॉ. वर्षा घड्याळे यांनी शिक्षण ते पीएचडीपर्यंतचा व त्यापुढील प्रवासाचे वर्णन करून सर्व प्राध्यापिकाना पुढील शिक्षणासाठी प्रेरणा दिल्या. प्रा. निशा केळकर यांनी त्यांचा संशोधन प्रवास मांडताना संस्था व महाविद्यालयाचे त्यासाठी मोलाचे श्रेय आहे हे नमूद केले. माजी विद्यार्थिनी सिद्धी महाजन हिने भौतिकशास्त्र शिक्षण, त्यानंतर पत्रकारितेची आवड जपत वृत्तपत्रामध्ये विज्ञान आणि तंत्रज्ञान क्षेत्रातील महिला याबद्दलचे लेखन याचा अनुभव कथन केला. सूत्रसंचालन प्रा. तेजश्री भावे यांनी केले.