आमदार साळवींच्या जुन्या, नव्या घरांची घेतली मोजमापे
rat२७५०.txt
बातमी क्र. ५० (पान ३ साठी)
आमदार साळवींच्या घरांची घेतली मोजमापे
रत्नागिरी, ता. २७ : लांजा-राजापूर विधानसभा मतदार संघाचे ठाकरे सेनेचे आमदार आणि उपनेते राजन साळवी यांच्यामागे रायगड लाचलुचपत प्रतिबंधक विभागाकडून ससेमिरा सुरूच आहे. साळवी यांच्या जुन्या, नव्या घरांची तसेच हॉटेलची मोजमापे आज घेण्यात आली. लाचलुचपत प्रतिबंधक विभागाच्या अधिकाऱ्यांच्या उपस्थितीमध्ये सार्वजनिक बांधकाम विभागाच्या अधिकारी व कर्मचाऱ्‍यांनी ही नोंद घेतली. याबाबतच अहवाल रायगड एसीबीला पाठवला जाणार आहे.
रायगड लाचलुचपत प्रतिबंधक विभागाकडून ठाकरे गटाचे उपनेते आमदार राजन साळवी यांची चौकशी सुरु आहे. साळवी यांच्यासोबत त्यांच्या स्वीय्य सहायकापासून ठेकेदारांचीही चौकशी सुरु आहे. त्यासाठी त्यांना वारंवार रायगड एसीबी कार्यालयात हजर राहावे लागते. त्यांच्या कुटुंबातील सदस्यांनाही चौकशीसाठी बोलावले जाते. एकदाचे काय ते करा, मला आत टाका. परंतु कुटुंबीयांना त्रास देऊ नका,अशी संतप्त प्रतिक्रिया साळवी यांनी दिली होती. दरम्यान, लाचलुचपत विभागाच्या अधिकाऱ्यांच्या सूचनेनुसार रत्नागिरीतील सार्वजनिक बांधकाम विभागाच्या अधिकारी व कर्मचाऱ्‍यांनी आज प्रथम तेलीआळी येथील आमदार साळवी यांच्या जुन्या घराची व मुख्य मार्गावरील हॉटेलची मोजणी घेतली. त्यानंतर खालचीआळी परिसरातील नव्या घराचीही मापे घेण्यात आली. यावेळी आमदार साळवी यांचे मोठे बंधू दीपक साळवीही उपस्थित होते. या बाबतचा अहवाल बांधकाम विभाग एसीबी रायगडला पाठवणार आहे. सुमारे अडीच तास ही प्रक्रिया सुरू होती.
हे ही वाचा
