Police Constable Exam : पोलीस शिपाई पदांसाठी 2 एप्रिलला लेखी परिक्षा

ओरोस - जिल्हा पोलीस भरती २०२१ मधील पोलीस शिपाई पदासाठी लेखी परीक्षेस पात्र ठरलेल्या ११८८ उमेदवारांची लेखी परीक्षा २ एप्रिलला सकाळी ८.३० वाजता कुडाळ येथील संत राऊळ महाराज कॉलेज, कराची महाराष्ट्र शिक्षण प्रसारक इंग्लिश स्कूल व कुडाळ हायस्कूल या तीन केंद्रांवर घेण्यात येणार आहे, अशी माहिती जिल्हा पोलिस अधीक्षक सौरभ अग्रवाल यांनी दिली आहे.

जिल्हा पोलिस दलातील २०२१ मधील रिक्त कॉन्स्टेबल ९९ पदांसाठी मैदानी ५ ते ११ जानेवारी कालावधीत जिल्हा पोलिस मैदानावर घेण्यात आली होती. २०२१ मधील रिक्त पदांच्या आधारे ही प्रक्रिया राबविली जात आहे. चालक पदाच्या २३ जागांसाठी दोन हजार १२६ तर कॉन्स्टेबल पदाच्या ९९ जागांसाठी ५ हजार ९५८ अर्ज आले होते. यातील चालक पदासाठी २ ते ४ जानेवारी कालावधीत तर कॉन्स्टेबल पदासाठी ५ ते ११ जानेवारी या कालावधीत शारीरिक व मैदानी चाचणी घेण्यात आली होती.

यावेळी उमेदवारांना मिळालेल्या गुणांच्या आधारे एकास दहा या प्रमाणे लेखी परीक्षेसाठी प्रवर्ग व समांतर आरक्षण निहाय निवड यादी तयार करण्यात आली आहे. याप्रमाणे लेखी परीक्षेसाठी पात्र ठरलेल्या उमेदवारांची यादी यापूर्वीच प्रसिद्ध करण्यात आली आहे. कॉन्स्टेबल पदाच्या एकूण ९९ जागांसाठी ही भरती प्रक्रिया राबविली जात असून एकूण ११८८ उमेदवारांची यादी प्रसिद्ध करण्यात आली आहे. लेखी परीक्षेसाठी जाहीर करण्यात आलेल्या ११८८ उमेदवारांच्या यादीत ९३१ पुरुष उमेदवारांची नावे आहेत.

५९ माजी सैनिक तर १९६ महिला उमेदवारांची नावे आहेत. लेखी परीक्षेस पात्र ठरलेल्या उमेदवारांना लेखी परीक्षेचे प्रवेश पत्र हे 'महाआयटी' मार्फत ऑनलाईन पद्धतीने डाऊनलोड करण्यास उपलब्ध करून देण्यात आले आहे. परीक्षा केंद्रावर उमेदवारांनी दोन तास अगोदर पोहोचणे आवश्यक आहे. या संदर्भात काही अडचण, समस्या असल्यास उमेदवारांनी पोलीस नियंत्रण कक्षावर संपर्क साधावा, असे आवाहन पोलीस अधीक्षक सौरभ अग्रवाल यांनी केले आहे.