आचऱ्यात १५४ कासव पिल्ले झेपावली समुद्रात

95538
आचरा ः येथील समुद्रकिनारी संवर्धन केलेल्या ऑलिव्ह रिडले कासवांच्या पिल्लांना सरपंच प्रणया टेमकर यांच्या हस्ते समुद्रात सोडण्यात आले.

आचऱ्यात १५४ कासव पिल्ले झेपावली समुद्रात

कासव मित्र धुरींकडून संवर्धन; किनारी १४ घरटी, वनविभागाचाही नजर

सकाळ वृत्तसेवा
आचरा, ता. १३ : आचरा समुद्रकिनारी कासवमित्रांनी संवर्धन केलेल्या घरट्यातून बाहेर आलेल्या ऑलिव्ह रिडले जातीच्या कासवाच्या पिल्लांना वनविभाग अधिकाऱ्यांच्या मार्गदर्शनाखाली पर्यावरणप्रेमी कासव मित्र सूर्यकांत धुरी यांच्या मार्गदर्शनानुसार गणेश धुरी यांनी संवर्धन केलेल्या अंड्यामधून १५४ जन्मलेल्या कासव पिल्लांना सरपंच प्रणया टेमकर यांच्या हस्ते समुद्री अधिवासात सोडण्यात आले.
सुर्यकांत धुरी यांनी सरकारी नियमाप्रमाणे कासवांच्या अंड्यांचे संवर्धन करत काल (ता.१२) ५१ दिवसांनी त्या अंड्यांबाहेर पडलेल्या १५४ पिल्लांची बॅच आचरा सरपंच टेमकर यांच्या हस्ते समुद्रात सोडली. आचरा-पिरावाडी येथील समुद्र किनाऱ्यावर मोठ्या प्रमाणात ऑलिव्ह रिडले कासवांची अंडी आढळली होती. या वर्षाच्या सुरुवातीपासून कासव संवर्धनास वेग आला असून तब्ब्ल १४ घरटी आचरा किनाऱ्यावर तयार करण्यात आली आहेत. यातील सात बॅच टप्प्या टप्प्याने सोडण्यात आल्या आहेत. ही कासवाची अंडी वनविभागाच्या देखरेखीखाली दोन महिन्यांपूर्वीपासून समुद्रकिनारी संरक्षित करण्याचे काम कासव मित्रांनी हाती घेतले आहे. आचरा ते तोंडवळी या समुद्र किनारी भागात कासव मोठ्या संख्येने दाखल होत असून या किनाऱ्यांना पसंती देत आहेत. यावेळी ग्रामविकास अधिकारी पी. जी. कदम, ग्रामपंचायत कर्मचारी सुशिला पांगे, गिरिधर आपकर, पोलिसपाटील विठ्ठल धुरी, कासव सवर्धक शितल धुरी, सृष्टी धुरी, पराग कुबल, महादेव जोशी आदी उपस्थित होते.
-----------
चौकट
आचरा किनाऱ्यास कासवांची पसंती
आचरा किनाऱ्यास ‘ऑलिव्ह रिडले’ या जातीची कासवे पसंती देताना दिसत आहेत. तळाशील ते आचरा हा कासवांचा अंडी घालण्याचा किनारा म्हणून अलीकडच्या काळात ओळखला जाऊ लागला आहे. या भागातील ग्रामस्थ ही अंडी सुरक्षित ठेऊन अन्य हिंस्त्र प्राण्यांपासून त्यांचे जतन करत आहेत. दोन महिन्यानंतर पिल्ले बाहेर पडली की वनाधिकारी यांच्या मार्गदर्शनाखाली समुद्रात सोडत आहेत.