दोडामार्ग ठाण्यास महानिरीक्षकांची भेट

दोडामार्ग ठाण्यास महानिरीक्षकांची भेट
दोडामार्ग ः कोकण परिक्षेत्राचे पोलिस महानिरीक्षक प्रवीण पवार यांनी शुक्रवारी येथील पोलिस ठाण्याला भेट दिली. येथील सीमा तपासणी नाक्यांची पाहणी करत त्यांनी आढावा घेतला. कर्नाटक विधानसभा निवडणुकीच्या पार्श्वभूमीवर ही पाहणी करण्यात आली असल्याचे पोलिसांकडून सांगण्यात आले. शिवाय गोवा राज्यही लगत असल्याने कर्नाटकात अवैध मार्गाने दारू तसेच मतदारांना आकर्षित करण्यासाठी रोकड अथवा अन्य साहित्याची वाहतूक होण्याची शक्यता नाकारता येत नाही. त्यानुषंगाने तालुक्यात खोक्रल, वीजघर, दोडामार्ग, आयी अशा चार ठिकाणी तपासणी नाके उभारण्यात आले आहेत. पोलिस महानिरीक्षक प्रवीण पवार यांनी सर्व तपासणी नाक्यांची पाहणी करून पोलिस निरीक्षक ऋषिकेश अधिकाऱ्यांना घ्यायची खबरदारी व कारवाईबाबत आवश्यक त्या सूचना केल्या.
---
किल्ले रामगडवर उद्या दीपोत्सव
मालवण ः महाराष्ट्र दुर्गवीर प्रतिष्ठान आणि रामगड ग्रामस्थ यांच्या संयुक्त विद्यमाने महाराष्ट्र दिनानिमित्त सोमवारी (ता. १) किल्ले रामगड येथे विविध कार्यक्रमांचे आयोजन करण्यात आले आहे. सकाळी नऊला रामगड बाजारपेठ ते रामगड किल्ला पालखी मिरवणूक, साडेदहाला गडपूजन, गणेश पूजन, छत्रपती शिवाजी महाराज पूजन, सायंकाळी सहाला शिवकाळाची अनुभूती करून देणारा दीपोत्सव आणि मशालोत्सव आदी कार्यक्रम होणार आहेत.
----------------
नेरुरला मंगळवारी धार्मिक कार्यक्रम
नेरुर ः नेरुर-वाघोसेवाडी येथील सिद्धपुरुष मित्रमंडळातर्फे मंगळवारी (ता. २) विविध कार्यक्रमांचे आयोजन केले आहे. यानिमित्त श्रींची महापूजा, दुपारी आरती, तीर्थप्रसाद, महाप्रसाद, सायंकाळी चारला भजने, सहाला सांस्कृतिक कार्यक्रम व रात्री नऊला सिद्धेश्वर दशावतार मंडळ, दोडामार्ग यांचे नाटक होणार आहे. उपस्थित राहण्याचे आवाहन आयोजांनी केले आहे.
-----------------
मालवणात क्रिकेट स्पर्धेचे आयोजन
मालवण ः राजकोट बॉईज क्रिकेट संघ व राजकोट मित्रमंडळ आयोजित प्रकाशझोतातील कृष्णा बापू भाबल स्मृती चषक बॉक्स अंडरआर्म क्रिकेट स्पर्धा ९ ते १३ मे दरम्यान राजकोट मेढा येथे आयोजित केली आहे. विजेत्या संघाला ५१ हजार, उपविजेत्या संघाला २५ हजार, उपांत्य फेरीतील पराभूत संघांना ५,५५५ रुपये व प्रत्येकी चषक व अन्य वैयक्तिक पारितोषिके देऊन गौरविण्यात येणार आहे. नावनोंदणीसाठी प्रसाद यांच्याशी संपर्क साधावा, असे आवाहन केले आहे.