तिहेरी अपघातात दुचाकीस्वार जखमी

99426
आंबेली ः अपघातात दुचाकीचा चक्काचूर झाला.
99427
आंबेली ः मोटारीचे झालेले नुकसान. (छायाचित्र ः संदेश देसाई)

तिहेरी अपघातात दुचाकीस्वार जखमी

आंबेलीत घटना; मोटारीला धडकून दुचाकी ट्रकखाली

सकाळ वृत्तसेवा
दोडामार्ग, ता. २९ ः तिलारी राज्यमार्गावर आंबेली येथील वळणावर आज तिहेरी अपघातात दुचाकीस्वार जखमी झाला. त्याच्यावर गोव्यात उपचार सुरू आहेत. मोटारीने ठोकर देताच समोरून येणाऱ्या ट्रकच्या चाकाखाली दुचाकी सापडली. वेगात असलेल्या मोटारीमुळे हा अपघात झाल्याची फिर्याद ट्रक चालकाने पोलिस ठाण्यात दिली. त्यानुसार मोटार चालकावर गुन्हा दाखल केल्याची माहिती पोलिस निरीक्षक ऋषिकेश अधिकारी यांनी दिली. हा अपघात आज सकाळी साडेअकराच्या सुमारास झाला.
याबाबत ट्रक चालकाने पोलिस ठाण्यात दिलेल्या फिर्यादीनुसार, ट्रकमधून सिमेंटचे मोठे पाईप घेऊन कुडाळ येथून दोडामार्ग मार्गे मोर्लेच्या दिशेने चालक जात होता. आंबेली येथे नाईक मंगल कार्यालयानजीक एक दुचाकीस्वार ट्रकला बाजू देऊन भेडशीच्या दिशेने जाण्याच्या प्रयत्नात असताना समोरून येणाऱ्या वाहनाच्या मागच्या बाजूने येणाऱ्या मोटारीने वळणावर बाजू घेऊन मोटार चालक विरुद्ध दिशेला आला; मात्र ट्रकच्या समोर असलेल्या दुचाकीस्वाराला धडक दिली. धडक बसताच दुचाकीस्वार वाहकाच्या बाजूकडील चाकाकडे येऊन कोसळला. तर दुचाकी ट्रकच्या चाकाखाली आली. प्रसंगावधान राखत ट्रक जागीच उभा केल्याने अनर्थ टळला. या अपघातात दुचाकीस्वार जखमी झाला. या अपघातात तिन्ही वाहनांचे नुकसान झाले. मोटारचालक वेगात असल्याने हा अपघात घडला असल्याचेही फिर्यादीत म्हटले आहे. त्यानुसार मोटारचालकावर गुन्हा दाखल केल्याची माहिती पोलिस निरीक्षक ऋषिकेश अधिकारी यांनी दिली.