शाळकरी विद्यार्थ्यांनी केला बारसू सडा स्वच्छ

rat6p8.jpg
07430
राजापूरः बारसू सडा परिसरातील गोळा केलेल्या कचऱ्यासमवेत शाळकरी मुले.
-----------
शाळकरी विद्यार्थ्यांनी
केला बारसू सडा स्वच्छ
पर्यावरण दिन ; प्लास्टिक कचऱ्याचे संकलन
सकाळ वृत्तसेवा
राजापूर, ता. ६ः जागतिक पर्यावरणदिनाचे औचित्य साधत बारसू- सोलगाव परिसरातील शाळकरी विद्यार्थ्यांनी एकत्र येत सोमवारी (ता. ५) बारसूच्या सड्यावर एकत्र येत या सडा परिसराची स्वच्छता केली. विविध कारणांमुळे पर्यावरणाचा र्‍हास होत असताना पर्यावरण जतन आणि संवर्धनाच्या जाणिवेतून मुलांनी राबवलेल्या या अभियानाचे कौतुक केले जात आहे.
प्रस्तावित रिफायनरी प्रकल्पावरून तालुक्यातील बारसू परिसर चांगलाच चर्चेत आला आहे. प्रकल्प उभारणीच्या अनुषंगाने आवश्यक असलेल्या माती परीक्षणासाठी बोरवेल मारण्याचे काम शासनाकडून बारसू परिसरामध्ये गत महिन्यामध्ये करण्यात आले. या परीक्षणाच्या कामावरून प्रकल्प विरोधक ग्रामस्थ आणि पोलिस-प्रशासन यांच्यामध्ये संघर्षही पाहायला मिळाला होता. माती परीक्षणावेळी ग्रामस्थांसह पोलिस प्रशासनही बारसू सडा परिसरामध्ये दिवसरात्र तळ ठोकून होते. या कालावधीमध्ये सड्यावर मोठ्या प्रमाणात प्लास्टिक बाटल्यांसह अन्य स्वरूपाचा कचरा टाकण्यात आला होता. हा प्लास्टिक कचरा पर्यावरणाला घातक ठरणारा आहे.
त्याचवेळी या परिसरामध्ये चारा खाण्यासाठी फिरणाऱ्या गुरांच्या जीविताच्यादृष्टीनेही धोकादायक ठरणारा आहे. त्यामुळे पर्यावरणीय आणि सामाजिक जाणिवेतून बारसू-सोलगाव परिसरातील शाळकरी विद्यार्थ्यांनी पर्यावरणदिनाचे औचित्य साधून सडा पसिररातील प्लास्टिक कचर्‍याचे संकलन केले. या उपक्रमाद्वारे सडा परिसराची स्वच्छता होताना पर्यावरणाला घातक ठरणाऱ्या कचऱ्याचेही संकलन झाले. सामाजिक जाणिवेतून राबवण्यात आलेल्या या शाळकरी मुलांच्या प्लास्टिक कचरा संकलन उपक्रमाचे सर्व स्तरातून कौतुक केले जात आहे.