आंबोली घाटीत मिळालेल्या मृताचे रेखाचित्र बनविणार

आंबोली घाटीत मिळालेल्या
मृताचे रेखाचित्र बनविणार
सकाळ वृत्तसेवा
सावंतवाडी, ता. ६ः आंबोली घाटातील अज्ञात मृताची ओळख पटविण्यासाठी येथील पोलिसांकडून त्याचे स्केच तयार केले जाणार आहे. हुबेहूब त्या व्यक्तीचे रेखाचित्र तयार करून सर्व पोलिस ठाण्यांना पाठविणार असल्याची माहिती पोलिस निरीक्षक ऋषिकेश अधिकारी यांनी दिली.
आंबोली येथे दरीत आढळून आलेल्या अज्ञात व्यक्तीची ओळख पंधरा दिवस उलटत आले तरी पटलेली नाही. पोलिसांनी सर्व प्रकारे प्रयत्न करूनही ओळख पटविण्यात अपयश आले आहे. राखून ठेवलेला व्हिसेरा फॉरेन्सिक लॅबमध्ये पाठविण्यात आला आहे. त्यावरून काही माहिती मिळते का, हे पोलिस पाहत आहेत. दरम्यान, लॅबचा अहवाल येईपर्यंत पोलिस अन्य मार्गांनी ओळख पटविण्याच्या प्रयत्नात आहेत. अनोळखी व्यक्तीचे वर्णन लक्षात घेऊन त्याचे रेखाचित्र तयार केले जाईल. ते सर्व पोलिस ठाण्यांना पाठवून सार्वजनिक ठिकाणी प्रसिद्ध करण्यात येणार आहे. घाटात दरीत आढळून आलेल्या मृतदेहाच्या पेहेरावावरून तो घाटमाथ्यावरील कामगाराचा असल्याचे दिसत होते. असा पेहराव घाटमाथ्यावरील कामगारांमध्ये जास्त दिसून येतो. त्यामुळे हा मृतदेह घाटावरील कामगाराचा असल्याचा संशय पोलिसांना आहे. त्या दृष्टीने तपास सुरू आहे. रेखाचित्र तयार करून काही धागेदोरे हाती लागतात का, यासाठी पोलिस प्रयत्नरत आहेत.