रत्नागिरी-मिर्‍याच्या ग्रोयन बंधाऱ्याचे काम पुन्हा सुरू

मिऱ्या‍च्या ग्रोयन बंधाऱ्याचे काम पुन्हा सुरू
रत्नागिरी, ता. ११ ः पावसाळा नियमित सुरू झाल्याने मिर्‍या धूपप्रतिबंधक बंधार्‍याचा जुना बंधारा काढून तेथे नवीन बंधार्‍याचे काम धोकादायक असते. त्यामुळे जो नवीन बंधारा झाला आहे त्या ठिकाणी टेट्रापॉडस् टाकले जात असून, आधुननिक ग्रोयन पद्धतीने काम केले जात आहे. पावसामुळे गेले काही दिवस कामाचा वेग मंदावला होता; परंतु, आता पावसाची विश्रांती आणि ऊन असल्याने पुन्हा त्या कामाने वेग घेतला आहे.
शहरालगतच्या मिऱ्या‍ येथील समुद्रात टेट्रापॉडस् व ग्रोयनचा धूपप्रतिबंधक बंधारा बांधला जात आहे. गेल्या सप्टेंबर महिन्यापासून प्रत्यक्ष काम सुरू झाले आहे. सुमारे १९२ कोटी रुपये खर्चाचा हा बंधारा एकूण ३४०० मीटरचा आहे. पाऊस नियमित सुरू होईपर्यंत त्यातील १६०० मीटरच्या बंधाऱ्‍याचे काम पूर्ण झाले आहे. पुढील बंधारा बांधण्यासाठी जुन्या बंधाऱ्‍याचे दगड काढावे लागतात. पावसाळ्यात मिऱ्‍या समुद्रात उधाणाच्या मोठमोठ्या लाटा उसळतात. जुना बंधारा उघडल्यास उधाणांच्या लाटांमुळे समुद्राचे पाणी गावातील घरापर्यंत जाण्याची भीती असते. त्यामुळे जो १६०० मीटरचा बंधारा पूर्ण झाला आहे त्याला पूरक असलेले टेट्रापॉडस् टाकण्याचे ग्रोयन पद्धतीचे काम केले जात आहे. हे कामसुद्धा भरती-ओहोटीसह उधाणाचा अंदाज घेऊन करावे लागते. त्यामुळे ओहोटीच्या वेळेतच हे काम वेगाने होते. त्यानुसार टेट्रापॉडस् टाकण्याचे आणि बंधार्‍याच्या पृष्ठभागावर ग्रोयन पद्धतीचे काम करून घेतले जात आहे.