विजेसाठी नांदोसवासीयांची एकजूट

18009
नांदोस ः वीज वाहिन्यांवर पडलेले झाड ग्रामपंचायत सदस्य ढोलम व युवकांनी महावितरण कर्मचाऱ्यांच्या मदतीने बाजूला केले.

विजेसाठी नांदोसवासीयांची एकजूट

आवाहनास प्रतिसाद; कट्टा, बाजारपेठ परिसरात वीज पूर्ववत

सकाळ वृत्तसेवा
मालवण, ता. २२ : तालुक्यातील नांदोस येथे वीज वाहिनीवर झाड कोसळल्याने कट्टा, गोकुळआळी व बाजारपेठेतील वीजपुरवठा खंडित झाला. महावितरणच्या कर्मचाऱ्यांसह नागरिकांनी सहकार्य केल्यास वीजपुरवठा पूर्ववत सुरू करता येईल, असे आवाहन करत ठाकरे गटाचे ग्रामपंचायत सदस्य वंदेश ढोलम व अन्य युवकांनी घेतलेल्या पुढाकारामुळे वीजपुरवठा सुरू करण्यात यश मिळाले.
नांदोस येथे शुक्रवारी (ता. २१) सायंकाळी विद्युत वाहिनीवर झाडाची फांदी कोसळल्यामुळे परिसरातील काही ठिकाणचा वीजपुरवठा खंडित झाला. नागरिकांनी वीज कर्मचाऱ्यांना संपर्क साधून समस्या सांगितली असता त्यांनी नागरिकांनी सहकार्य केल्यास त्वरित वीजपुरवठा सुरळीत करता येईल, असे सांगितले. या आवाहनाची तातडीने दखल घेत ठाकरे गट शिवसेनेचे ग्रामपंचायत सदस्य ढोलम, समीर माळवदे, निखिल बांदेकर, किरण वाईरकर, उपेंद्र बोडये, सिद्धार्थ हिरवे, दर्शन म्हाडगुत यांनी वीज कर्मचाऱ्यांसोबत जंगल भागात जाऊन विद्युत वाहिनीवरील फांदी बाजूला करण्यास मदत केली. वीज कर्मचारी गणेश वारंग, मोहाळे व वायंगणकर यांनी रात्री उशिरापर्यंत काम करून परिसरातील वीजपुरवठा सुरळीत केला.
विद्युत पुरवठा खंडित झाल्यामुळे कट्टा, गोकुळआळी व बाजारपेठ परिसरात विजेच्या समस्येसह शुक्रवार आणि शनिवारी या वाहिनीवर असलेल्या सार्वजनिक नळयोजनेवरून पाणीपुरवठा होऊ शकला नसता. त्यामुळे पाण्याची समस्या निर्माण होऊन याचा ग्रामस्थांना नाहक मनस्ताप सहन करावा लागला असता. त्यामुळे ग्रामपंचायत सदस्य ढोलम आणि युवा सैनिकांचे नागरिकांनी आभार मानले.