-रत्नागिरी ः भजनी कलाकारांसाठी शास्त्रोक्त मार्गदर्शन 5 ला

भजनी कलाकारांसाठी
शनिवारी शास्त्रोक्त मार्गदर्शन
श्रीराम कट्टाचा उपक्रम ; बारकावे आत्मसात करता येणार
सकाळ वृत्तसेवा
रत्नागिरी, ता. १ः कोकणातील लोककलांना परंपरा आहे. त्यातही भजनी कलेची महती ही मोठी आहे. परशुराम पांचाळ, चंद्रकांत कदम, विलास पाटील यांच्यासारख्या अनेक नामवंत भजन सम्राटांनी ही परंपरा अखंडित ठेवली. ईश्वर भक्तीमध्ये लिन करणारी, मनात भक्तिभाव रुजविणारी भजन कला भविष्य काळातही अखंडित ठेवणे समाजाच्या स्वास्थ्यासाठी अत्यंत आवश्यक आहे. येथील श्रीराम मंदिर ज्येष्ठ नागरिक कट्टाने सामाजिक बांधिलकी जपत भजन कला परंपरा पुढे सुरू रहावी यासाठी भजन कला प्रशिक्षण उपक्रम श्रीराम मंदिरात सुरू केला आहे. भजनी कलाकारांसाठी शास्त्रोक्त मार्गदर्शन मेळावा ५ ऑगस्टला दुपारी ३ ते ५ या वेळात श्रीराम मंदिरात होणार आहे.
तालुक्यातील हरचेरी-उमरे येथील भजनी बुवा विश्वनाथ भाटे मार्गदर्शन करणार आहेत. भजनी कलावंतांनी मोठ्या संख्येने उपस्थित राहून या उपक्रमाचा लाभ घ्यावा, असे आवाहन श्रीराम कट्ट तर्फे करण्यात आले आहे.
श्रीराम मंदिर येथे ज्येष्ठ नागरिक कट्टातर्फे गेल्या महिन्यात भजन कला प्रशिक्षण शिबिरात भाटेबुवांच्या मार्गदर्शन मेळाव्याला सुमारे शंभर भजनी कलावंतानी उत्स्फूर्त प्रतिसाद दिला होता. त्यामध्ये महिला भजनी कलाकारांचाही सहभाग होता. श्रीराम मंदिर ज्येष्ठ नागरिक कट्टा तर्फे विविध उपक्रम राबविले जात असून त्यातीलच भजन कला मार्गदर्शन हा एक उपक्रम आहे.
दरम्यान याआधी झालेल्या भजन कला मार्गदर्शन उपक्रमाला भजनी कलावंतांनी भरभरून प्रतिसाद दिल्याने कलेतील बारकावे आत्मसात करता यावेत, यासाठी दुसऱ्यांदा असा प्रशिक्षण उपक्रम होत आहे. कलाकारांच्या विनंतीनुसार कट्टाचे मुख्य संयोजक सुरेश लिमये आणि सचिव सुरेंद्र घुडे यांनी येत्या शनिवारी भजन कला मार्गदर्शन मेळावा आयोजित केला.