पालकांसह प्रशाळेचा नावलौकिक करा

26832
पणदूर ः येथील महाविद्यालयात नवोदित विद्यार्थ्यांचे स्वागत करताना प्रकाश जैतापकर, डॉ. गोडकर आदी. (छायाचित्र ः अजय सावंत)

पालकांसह प्रशाळेचे नाव उज्वल करा

प्रकाश जैतापकर ः पणदूर महाविद्यालयात विद्यार्थ्यांचे स्वागत

सकाळ वृत्तसेवा
कुडाळ, ता. ३० ः ‘पालकांचे स्वप्न साकार करण्यासाठी प्रत्येक विद्यार्थ्याने ध्येय समोर ठेवून दर्जेदार शिक्षण घ्यावे. सर्व क्षेत्रांत नावलौकिक मिळवून स्वतःचे आणि आपल्या महाविद्यालयाचे नाव उज्ज्वल करा, असे प्रतिपादन दादासाहेब तिरोडकर शैक्षणिक अकादमीचे उपाध्यक्ष प्रकाश जैतापकर यांनी केले.
पणदूर येथील पद्मश्री बाबासाहेब वेंगुर्लेकर महाविद्यालयात शैक्षणिक वर्ष २०२३-२४ मध्ये प्रवेश घेतलेल्या नवोदित विद्यार्थ्यांचा स्वागत समारंभ महाविद्यालयाच्या सेमिनार हॉलमध्ये जैतापकर यांच्या अध्यक्षतेखाली झाला. अकादमीचे सचिव डॉ. अरुण गोडकर यांनी, सतत सकारात्मक विचार मनात ठेवून विचार, कृती व प्रामाणिकपणा यावर आपले लक्ष्य केंद्रित करून आपले नाव उज्ज्वल करा, असा संदेश देतानाच विद्यार्थ्यांना शुभेच्छा दिल्या. महाविद्यालयाचे प्राचार्य डॉ. संभाजी शिंदे यांनी महाविद्यालयात उपलब्ध असलेल्या सोयीसुविधा, विविध शिष्यवृत्ती याबद्दल माहिती दिली. इथला प्रत्येक व्यक्ती शशिकांत अणावकर यांनी दिलेल्या शिस्तीचे धडे गिरवत आपले काम प्रांजळपणे करत आहे. महाविद्यालय १०० टक्के निकालाच्या दिशेने पावले उचलत असून, ही बाब सर्वांसाठी अभिमानास्पद असल्याचे त्यांनी सांगितले. विद्यार्थ्यांनी एकलव्याच्या भूमिकेतून शिकत राहिल्यास यश संपादन करण्यास कोणतीच अडचण आड येऊ शकत नाही, असे विचार त्यांनी व्यक्त करत त्यांनी नवोदितांना शुभेच्छा दिल्या. टी.वाय., आय.टी.ची विद्यार्थिनी सानिका चव्हाण, टी.वाय., बी.बी.आय.मधील ग्रेसी पिंटो यांनी आपले तीन वर्षांतील अनुभव व महाविद्यालयाची महती सांगत नवोदित विद्यार्थ्यांना मार्गदर्शन केले. दरम्यान, प्रा. अमेय पाटकर यांच्या मार्गदर्शनाखाली या कार्यक्रमाचे नियोजन झाले. प्राचार्य डॉ. शिंदे यांनी मान्यवरांचे पुष्पगुच्छ देऊन स्वागत केले. सांस्कृतिक विभाग प्रमुख प्रा. अमेय पाटकर यांनी प्रास्ताविक केले. प्रा. स्मिता परब यांनी सूत्रसंचालन केले. भाविका खानोलकर हिने आभार मानले.
---
मनोगते अन् गौरव सोहळा
प्रा. डी. व्ही. गावडे यांनी प्रातिनिधिक स्वरुपात विद्यार्थ्यांना शुभेच्छा दिल्या. प्रथम वर्षातील विद्यार्थिनी योगेश्वरी केळुसकर हिने मनोगतातून आपण एका आदर्श अशा कॉलेजमध्ये प्रवेश मिळविल्याबद्दल अभिमान व्यक्त केला. सिद्धी पात्रे हिने सर्व विद्यार्थी मिळून महाविद्यालयाचे नाव उंच शिखरावर नेऊ, असा विश्वास व्यक्त केला. यावेळी मुंबई विद्यापीठाच्या ५६ व्या विभागीय युवा महोत्सवात मेहंदी डिझायनिंग या कलाप्रकारात प्रथम क्रमांक प्राप्त केलेल्या यशश्री झुलपे हिचा मान्यवरांच्या हस्ते पुष्पगुच्छ व प्रमाणपत्र देऊन सत्कार करण्यात आला.