Grampanchayat Election: भाजप-ठाकरे शिवसेनेत चुरस, देवगडात ९ ग्रामपंचायतींसाठी लढती

सकाळ वृत्तसेवा
देवगड, ता. २ः तालुक्यातील ९ ग्रामपंचायतीच्या सार्वत्रिक निवडणुकीच्या प्रचाराची रंगत आता अंतिम टप्यात पोचली आहे. निवडणूकीमुळे संबधित गावातील राजकीय वातावरण ढवळून निघाले असून विजयासाठी जोरदार प्रचार सुरू आहे. सर्वसाधारणपणे भाजप विरूध्द ठाकरेगट शिवसेना अशीच चुरस रंगण्याची शक्यता अधिक आहे. ८ सरपंच जागांसाठी १८ तर ४१ सदस्य जागांसाठी एकूण ८३ उमेदवार रिंगणात आहेत. यासाठी रविवारी (ता.५) सकाळी ७.३० ते सायंकाळी ५.३० या वेळेत मतदान होणार असून सोमवारी (ता. ६) मतमोजणी होणार आहे.
तालुक्यातील ग्रामपंचायतींच्या सार्वत्रिक निवडणुकामध्ये वळीवंडे, शिरवली, रामेश्‍वर, पावणाई, फणसगांव, विठ्ठलादेवी, वानिवडे, तिर्लोट, ठाकूरवाडी आदी ९ ग्रामपंचयातींचा समावेश आहे.

ठाकूरवाडी येथील सरपंच पदासाठीची एक जागा बिनविरोध झाल्याने आता ८ सरपंच जागांसाठी १८ उमेदवार रिंगणात राहिले आहेत. सदस्य पदासाठीच्या ६९ जागांपैकी ठाकूरवाडीमध्ये दोन सदस्य जागांवर अर्ज न आल्याने ६७ जागांपैकी एकूण २६ जागा बिनविरोध झाल्याने आता ४१ सदस्य जागांसाठी ८३ उमेदवार रिंगणात राहिले आहेत. ठाकूरवाडीमध्ये दोन सदस्य जागांवर अर्ज न आल्याने त्या जागा रिक्त राहिल्या आहेत. तेथे केवळ एका जागेसाठी दोन उमेदवार रिंगणात आहेत.

वळिवंडे ग्रामपंचायतीमध्ये केवळ सरपंच पदासाठी दुरंगी लढत होत असून तेथे सदस्य पदाच्या सर्व जागा बिनविरोध झाल्या आहेत. ठाकूरवाडीमध्ये सरपंच जागा बिनविरोध ठरली आहे. विठ्ठलादेवीमध्ये सदस्य पदाच्या पाच जागा बिनविरोध ठरल्या आहेत. तेथे सरपंच आणि दोन सदस्य जागांसाठी लढत आहे. वानिवडेमधून सदस्य पदासाठीच्या चार जागा, वळिवंडेमधून सदस्य पदासाठीच्या सर्व ७ जागा, ठाकूरवाडीमध्ये चार जागा, शिरवलीमधून एक, पावणाई मधून चार तर फणसगांवमधून एक जागा बिनविरोध ठरली आहे. सदस्य पदासाठी बहुतांशी ठिकाणी दुरंगी लढत आहे. त्यामुळे मोठी चुरस आहे.

चौकट
सरपंच निवडीमध्ये चुरस
९ ग्रामपंचायतीमध्ये एक जागा बिनविरोध झाल्याने सर्वरित आठमध्ये सरपंच पदासाठी तिर्लोट आणि फणसगांवमध्ये तिरंगी तर रामेश्‍वर, विठ्ठलादेवी, वानिवडे, वळिवंडे, शिरवली, पावणाई याठिकाणी दुरंगी लढत रंगणार आहे. तिर्लोट आणि फणसगांव येथे मोठी चुरस आहे. वळिवंडे ग्रामपंचायतीमध्ये केवळ सरपंच पदासाठी दुरंगी लढत होत असून तेथील सदस्य पदाच्या जागा बिनविरोध झाल्या आहेत.

चौकट
दिवाळीआधीच राजकीय फटाके
सरपंच पदासाठी थेट लढती असल्याने राजकीय पक्षाचे लक्ष त्याकडे आहे. आगामी जिल्हा परिषद आणि पंचायत समिती निवडणूकीच्या अनुषंगाने याकडे रंगीत तालीम म्हणून पाहिले जात आहे. अधिकाधिक सरपंच जागा जिंकण्यासाठी राजकीय पक्षांमध्ये चुरस राहणार आहे. यासाठी प्रचाराची रंगत वाढली होती. सोमवारी (ता. ६) निकाल असल्याने दिवाळी आधी राजकीय फटाके फुटणार आहेत.