युद्धनौकांची मॉडेल्स ठरणार आकर्षण

३० (पान ५ साठी)

नौसेनेच्या युद्धनौकांच्या मॉडेलचे आकर्षण

सागर महोत्सव ; ११ ते १४ जानेवारीदरम्यान विविध उपक्रम

सकाळ वृत्तसेवा
रत्नागिरी, ता. ६ : आसमंत बेनवोलन्स फाउंडेशन आयोजित सागर महोत्सवाची जय्यत तयारी सुरू आहे. या महोत्सवात आगळेवेगळे आकर्षण असणार आहे. भारतीय नौसेनेच्या युद्धनौका व पाणबुडीची मॉडेल्स शाळा, महाविद्यालयीन विद्यार्थ्यांसह रत्नागिरीकरांनाही ही मॉडेल्स नक्कीच आवडतील. साधारण पाच फूट लांबीची ही मॉडेल्स महोत्सवादरम्यान पाहता येतील. गोगटे-जोगळेकर महाविद्यालयात महोत्सवाच्या ठिकाणी ती ठेवली जाणार आहेत.
आसमंत फाउंडेशनचे प्रमुख विश्वस्त नंदकुमार पटवर्धन यांनी या संदर्भात माहिती दिली. फाउंडेशनतर्फे येत्या ११ ते १४ जानेवारीदरम्यान हा महोत्सव गोगटे-जोगळेकर महाविद्यालयात रंगणार आहे. शिवाय सागरकिनारा अभ्यासफेऱ्या, लघुपट, व्याख्याने, होडीतून कांदळवन अभ्यासफेऱ्या आणि अंतरजिल्हा महाविद्यालयीन स्पर्धा अशा विविध कार्यक्रमांचे आयोजन केले आहे.
महोत्सवाकरिता गोगटे-जोगळेकर महाविद्यालयासह राष्ट्रीय समुद्रविज्ञान संस्था, नॅशनल इनोव्हेशन फाउंडेशन, वाईल्डलाईफ कॉन्झर्वेशन सोसायटी-इंडिया, कोस्टल कॉन्झर्वेशन फाउंडेशन आणि रत्नागिरी मत्स्य महाविद्यालाय यांचे सहकार्य व मार्गदर्शन लाभत आहे. महोत्सव सर्वांसाठी विनामूल्य खुला आहे. गेले वर्षभर गोगटे-जोगळेकर महाविद्यालयाबरोबर कोस्टल मॅपिंग हा उपक्रम सुरू आहे. पुढे समुद्राच्या/सागराच्या पाण्याचे आम्लीकरण या विषयावर अभ्यास करण्याचा मानस आहे. या महोत्सवात शालेय व महाविद्यालयीन विद्यार्थी, रत्नागिरीकरांनी बहुसंख्येने सहभागी होऊन पर्यावरण जागृती, सागर संवर्धनात सहभागी व्हावे, असे आवाहन आसमंत फाउंडेशनने केले आहे.