Dapoli Temperature : दापोली तालुक्यात भरली हुडहुडी, तापमान 9.4 अंशावर; आंबा, काजू कलमांवर परिणाम

हर्णै : दापोलीचा (Dapoli Temperature) पारा तिसऱ्यांदा खाली आला. आजच्या २४ तारखेला किमान तापमान ९.४ अं.से. अशी नोंद झाली आहे. यापूर्वी १६ जानेवारीला एवढेच तापमान होते. आता पुन्हा थंडीची लाट (Cold Snap) आली असून, तालुक्यामध्ये हुडहुडी भरली आहे.

कोकण कृषी विद्यापिठाच्या (Konkan Agricultural University) कृषी विभागातील गिम्हवणे येथील हवामान केंद्रावर पुन्हा किमान तापमान ९.४ अंश सेल्सिअ अशी नोंद २४ फेब्रुवारीला झाली आहे. राज्यात साधारणपणे ऑक्टोबरअखेर आणि नोव्हेंबरच्या सुरुवातीसच जिल्ह्यात थंडीला प्रारंभ होतो. यंदा नोव्हेंबरमध्ये एक-दोन दिवसच थंडीची चाहूल लागली. मात्र त्यानंतर थंडी गायबच झाली होती.

तापमान घसरल्याने तालुक्यात दिवसभर गारठा होता. गेले महिनाभर तापमानात चढउतार सुरू असल्याने त्याचा परिणाम आंबा, काजू कलमांवर होत आहे. मधेच दव पडत असल्याने आंबा आणि काजू कलमांना आलेल्या मोहोरावर विपरित परिणाम होत आहे. त्यामुळे बागायतदार चिंतेत पडले आहेत. कडाक्याच्या थंडीमुळे समुद्र किनाऱ्यावर सीगल पक्ष्यांचे आगमन झाले असून, थव्याने उडणारे हे पक्षी पाहण्यासाठी किनाऱ्यावर गर्दी होत आहे.