दोन उदमांजरांच्या बछड्याचा मृत्यू

दोन उदमांजरांच्या पिल्लांचा
वाहनाच्या धडकेत मृत्यू
लांजा-धुंदरे-दाभोळ मार्गावर घटना
लांजा, ता. २६ः तालुक्यातील धुंदरे-दाभोळ मार्गावर अनोळखी वाहनाची धडक बसून दोन पिल्लांचा मृत्यू झाला. ही मृत झालेली पिल्ले दुर्मिळ प्रजातीमधील उदमांजरांची असल्याचे स्पष्ट झाले आहे. वनविभागाने या प्राण्यांना चिरडणाऱ्या वाहनाचा शोध सुरू केला आहे.
रविवारी (ता. २४) लांजा-धुंदरे-दाभोळ मार्गावर एका अनोळखी वाहनाच्या धडकेत दोन पिल्लांचा मृत्यू झाल्याची घटना घडली होती. ही माहिती वनविभागाला मिळाल्यानंतर वनविभागाचे अधिकारी घटनास्थळी दाखल झाले. त्या दोन प्राण्यांचा शोध घेण्यासाठी पशुवैद्यकीय अधिकारी यांच्याकडे माहिती अहवाल मागवला होता. वनपाल दिलीप आरेकर यांनी सकृतदर्शनी ही रानमांजराची पिल्ले असण्याची शक्यता वर्तवली होती. पशुसंवर्धन अधिकारी श्रीमती प्राजक्ता बर्वे, वनरक्षक वाघाटे यांनी मृत दोन प्राण्यांचे शव ताब्यात घेऊन विच्छेदन केले. त्या वेळी ते दुर्मिळ उदमांजर असल्याचे स्पष्ट झाले. त्या दोन प्राण्यांना दफन करण्यात आले.