निवडणूक पानासाठी

२६ (निवडणूक पानासाठी)

खासदार निवडीत महिलांचा वाटा मोठा

सकाळ वृत्तसेवा
रत्नागिरी, ता. ४ः रत्नागिरीत महिला मतदारांची संख्या जिल्ह्यातील पाचही विधानसभा मतदारसंघात पुरुषांपेक्षा अधिक आहे. त्यामुळे या निवडणुकीतही नवा खासदार निवडण्यात या महिला मतदारांचा वाटा मोठा आहे. पाचही मतदारसंघात महिला मतदारांची संख्या ५१.६१ टक्के तर पुरुष मतदार ४८.३९ टक्के आहेत.
रत्नागिरी जिल्ह्यातील पाचही मतदारसंघांमध्ये महिला मतदारांची संख्या अधिक आहे. याचे प्रमुख कारण ग्रामीण भागातील पुरुष चाकरीसाठी मुंबईला मोठ्या संख्येने असल्यामुळे ग्रामीण भागात महिलांची संख्या अधिक आहे. जिल्ह्यातील पाच विधानसभा मतदारसंघात एकूण मतदार १२,९७,८२४ आहेत. यापैकी पुरुष ६,२७,९०८ आणि महिला ६,६९,९०५ आहेत. म्हणजेच सुमारे ४२ हजारांनी महिलांची संख्या अधिक आहे. राजापूर विधानसभा मतदारसंघात सर्वाधिक महिला मतदार आहेत. रत्नागिरी जिल्ह्यातील दापोली, गुहागर, चिपळूण, रत्नागिरी आणि राजापूर या पाच विधानसभा मतदारसंघात महिला मतदारांची टक्केवारी ५१.६१ इतकी आहे. तर पुरुष मतदार ४८.३९ टक्के आहेत. जिल्ह्यातील राजकारणात माजी आमदार कुसुमताई अभ्यंकर, मामी भुवड या महिलांचा राजकारणात सक्रिय सहभाग होता. त्यानंतरच्या पिढीतील रचना महाडिक, मंदा गुरव, रश्मी कदम, मनीषा जाधव, सोनाली सावंत यांनी जिल्हा परिषदेचे अध्यक्षपद भूषविले होते. तसेच अनेक महिला जिल्हा परिषदेच्या सदस्यही होत्या. रत्नागिरी-सिंधुदुर्ग लोकसभा मतदारसंघामध्ये महिला मतदार जास्त आहेत. तरीही आतापर्यंत महिला लोकप्रतिनिधींनी प्रतिनिधित्व केलेले नाही.
-------