चिपळूण-मराठा समाजाचे सर्वेक्षण करणारे प्रगणक मानधनाविना

पान ३

सर्वेक्षण करणारे प्रगणक मानधनाविना
प्राथमिक शिक्षक समिती ः जिल्हाधिकाऱ्यांना निवेदन
चिपळूण, ता. ४ : महाराष्ट्र राज्य मागासवर्गीय आयोगाच्यावतीने मराठा समाजाच्या सर्वेक्षणाचा कार्यक्रम पूर्ण करण्यात आला. यासाठी नेमणूक केलेल्या प्रगणकांनी महत्त्वाची भूमिका बजावली; मात्र या प्रगणकांना शासनाने जाहीर केलेले मानधन अद्याप प्राप्त झालेले नाही. ते मानधन संबंधितांना तातडीने द्यावे, अशी मागणी महाराष्ट्र पुरोगामी प्राथमिक शिक्षक समितीने जिल्हाधिकारी एम. देवेंदर सिंह यांच्याकडे केली आहे.
मराठा समाजाच्या सर्वेक्षणाचा कार्यक्रम अत्यंत तातडीने पूर्ण करण्यात आला. या सर्वेक्षणासाठी शिक्षक, अंगणवाडी कर्मचारी व अन्य शासकीय कर्मचाऱ्यांची प्रगणक म्हणून नेमणूक करण्यात आली होती. अत्यंत मर्यादित काळात हे सर्वेक्षण पूर्ण करण्यात कर्मचाऱ्यांनी फार मोठे योगदान दिले. सर्वेक्षणासाठी कर्मचाऱ्यांना योग्य ते मानधन दिले जाईल, अशा प्रकारचे निर्देश शासन परिपत्रकात नमूद करण्यात आले होते; मात्र कोणत्याही प्रगणकाला आजतागायत अशा प्रकारचे मानधन प्राप्त झालेले नाही. त्यामुळेच महाराष्ट्र पुरोगामी प्राथमिक शिक्षक समितीने जिल्हाधिकाऱ्यांमार्फत राज्य मागासवर्ग आयोगाला मानधनाबाबत निवेदन सादर दिले आहे. याचा त्वरित निर्णय व्हावा, अशी अपेक्षा संघटनेचे जिल्हा नेते प्रदीप पवार व जिल्हाध्यक्ष यशवंत पेढांबकर यांनी केली आहे.