दापोली समर सायक्लॉथॉन 28 एप्रिलला

३७ ( पान ५ साठी )

दापोली समर सायक्लॉथॉन रविवारी

प्रसिद्ध सायकलपटूंचा सहभाग; ६ तासात ६० किमी अंतर

सकाळ वृत्तसेवा
दाभोळ, ता. २५ : सायकल चालवण्याचे अनेक फायदे आहेत. सायकलसंस्कृती वाढावी व सायकलबद्दल आवड निर्माण व्हावी या हेतूने दापोली सायकलिंग क्लबतर्फे २८ एप्रिलला सकाळी दापोली समर सायक्लॉथॉन २०२४, सीझन ५ स्पर्धेचे आयोजन सोहनी विद्यामंदिर मैदान दापोली येथे करण्यात आले आहे. यासाठी महाराष्ट्रातील अनेक जिल्ह्यातून तसेच इतर राज्यातून अनेक नावाजलेले सायकलस्वार आपल्या कुटुंबासह दापोलीत येणार आहेत.
ही स्पर्धा १ ते ६० किमी अंतराची असून, ३० व ६० किमी कोस्टल सिनिक रूट, शॉर्ट सिटी लूप, फन राईड अशा गटात होणार आहे. प्रत्येक स्पर्धकाला आकर्षक मेडल आणि प्रमाणपत्र देऊन गौरवण्यात येईल शिवाय काही खास बक्षिसे पण असतील. ६० किमी सायक्लॉथॉन मार्ग सोहनी विद्यामंदिर दापोली ते हर्णै, मुर्डी, आंजर्ले, आडे, उटंबर, दापोली असा समुद्रकिनाऱ्यावरील गावातून असेल. ही स्पर्धा सकाळी पाच वाजता सुरू होईल. स्पर्धकांना ६ तासात ६० किमी अंतर पूर्ण करण्याचे आव्हान असेल. राईड मार्गावर स्वयंसेवक, पाणी, फळे, स्नॅक्स, मेडिकल मदत असेल. शॉर्ट सिटी लूप मार्ग दापोली शहरातील ४ किमीचा असेल. फनराईड विनामूल्य असून, ७ वाजता सुरू होईल.
यासाठी नोंदणी आवश्यक असून, नोंदणी फॉर्म विनी इलेक्ट्रिकल फॅमिली माळ, श्री सायकल मार्ट, जोशी ब्रदर्स मेडिकल बाजारपेठ, राऊत सायकल वडाचा कोंड, परेश बुटाला जालगाव या ठिकाणी देऊ शकता. सर्वांनी आपल्या कुटुंबीयांसमवेत सायकल चालवत यामध्ये सहभागी व्हा आणि तंदुरुस्त जीवनशैली अनुभवा, असे आवाहन करण्यात आले आहे.