नारायण राणेंचा प्रयत्न जमिनी हडपण्याचा

२९ (पान ३ साठी)

नारायण राणेंचा जमिनी हडपण्याचा प्रयत्न

विनायक राऊत ः सिडकोचा ब्रह्मराक्षस कोकणात का?

सकाळ वृत्तसेवा
रत्नागिरी, ता. २५ ः कोकणात प्रकल्प आणण्याच्या नावाखाली जमिनी हडपण्याचा प्रयत्न केंद्रीय मंत्री नारायण राणे करत आहेत. कोकण सिडकोच्या घशात घालायचा आणि येथील किनारपट्टीवरील लोकांना उद्ध्वस्त करायचं हा उद्देश आम्ही कदापी यशस्वी होऊ देणार नाही, असा इशारा देताना खासदार विनायक राऊत म्हणाले, उद्या (ता. २६) राजापूर दौऱ्यावर येणाऱ्या उपमुख्यमंत्री देवेंद्र फडणवीस यांनी सिडकोचा ब्रह्मराक्षस कोकणात का आणला याचं उत्तर द्यावे, असे आवाहन केले.
इंडिया आघाडीचे उमेदवार विनायक राऊत यांच्या प्रचारार्थ हरचेरी व नाचणे जिल्हा परिषद गटाचा मेळावा नाचणे येथे झाला. या वेळी राऊत म्हणाले, आम्ही कधीच कुणाचा अवमान केलेला नाही किंवा असंस्कृत, असंसदीय शब्दात उद्धार केलेला नाही; परंतु भाजपचे उमेदवार नारायण राणे ते करत आहेत. स्वतः केंद्रात उद्योगखात्याशी निगडित असलेले खाते सांभाळताना रत्नागिरीत उद्योगधंदे बंद झाले आहेत. याबाबत ते जेव्हा सांगतात तेव्हा राणे राज्याचे उद्योगमंत्री उदय सामंत यांच्याकडे बोट दाखवतात. भाजपने रत्नागिरी-सिंधुदुर्गमधून ज्यांना उमेदवारी दिली त्यांच्यावर विविध आरोप आहेत. अशा व्यक्तीला लोकसभेत पाठवणार का? आमचा विरोध हा प्रकल्प आणायला नाहीये; परंतु कोकणाला उद्ध्वस्त करणारे प्रकल्प आणि अशा प्रकल्पांच्या नावाखाली जमिनी बळकवण्याला आमचा विरोध कायम राहील.
प्रकल्पाच्या नावाखाली तुम्ही जमिनी हडप करायचा तर आम्ही विरोध करायचा की नाही? सी-वर्ड म्हणजे समुद्रातील विश्व आपण १३०५ एकर जमीन घेतली आणि १ हजार एकर स्वतःच्या मालकीच्या हॉटेलसाठी घेतली. मग याला विरोध करायला नको का? अशा प्रवृत्तीला विरोध करणारच असे राऊत यांनी यावेळी स्पष्ट केले.
-----------
देव तुम्हाला माफ करो

कोकणच्या संस्कृतीचा ऱ्हास करणारे भरल्या व्यासपीठावरून महिला बसल्या असताना शिवीगाळ करणारे, घाणेरड्या शिव्या तोंडात आणणारे नीलेश राणेंचं तुम्ही कौतुक करता! नारायणराव, देव तुम्हाला माफ करो आणि तुमचा पराभव लाखांच्या मताने करो असे राऊत म्हणाले.