Kokan Politics: राज ठाकरे करणार राणेंचा प्रचार, या दिवशी घेणार कणकवलीत सभा

Mumbai Newsरत्नागिरी-सिंधुदुर्ग लोकसभा महायुतीचे उमेदवार केंद्रीय मंत्री नारायण राणे यांच्या प्रचारार्थ मनसे अध्यक्ष राज ठाकरे यांची शनिवारी (ता.४) कणकवली येथे जाहीर सभा होणार आहे.

या सभेच्या आदल्या दिवशी होणाऱ्या उद्धव ठाकरे यांच्या सभेत महायुतीच्या नेत्यांच्या विरोधात बेताल वक्तव्य केल्यास या सभेत अंगावर आल्यास शिंगावर घेतल्याशिवाय राहणार नाही, असा इशारा भाजप जिल्हा अध्यक्ष प्रभाकर सावंत यांनी पत्रकार परिषदेत दिला.

सावंत यांनी आज येथील हॉटेल लाईम लाईट येथे पत्रकार परिषद घेतली. यावेळी भाजपा केंद्रीय कार्यकारणी सदस्य बंड्या सावंत, मनसे जिल्हाध्यक्ष धीरज परब, मनसे तालुकाध्यक्ष हेमंत जाधव, प्रदिप माने आदी उपस्थित होते.
श्री. सावंत म्हणाले, ‘‘गेले पंधरा दिवस महायुतीचे उमेदवार केंद्रीय मंत्री नारायण राणे यांच्या प्रचारार्थ सर्व स्तरातून बिनशर्त पाठिंबा मिळत आहे. त्यांच्या विजयासाठी महायुतीचे सर्व घटक पक्ष एकदिलाने काम करीत आहेत. जिल्हा परिषद, पंचायत समिती विभागातील बैठका, सभांना चांगला प्रतिसाद लाभत आहे.

महायुतीचे घटक पक्ष असणारे मनसे पक्षप्रमुख ठाकरे हे शनिवारी कणकवली उपजिल्हा रुग्णालयासमोर राणे यांच्या प्रचारार्थ जाहीर सभेला येत आहेत. या सभेच्या आदल्या दिवशी ३ मेस उध्दव बाळासाहेब ठाकरे पक्षाचे पक्षप्रमुख ठाकरे यांचीही त्याच ठिकाणी जाहीर सभा होत आहे. या सभेत त्यांनी मोदी, राणेंविरोधी राजकारण केले असेल तसेच महायुतीच्या उमेदवारांवर आरोप-प्रत्यारोप केल्यास भाजप ४ मेच्या सभेत अंगावर आल्यास शिंगावर घेतल्याशिवाय राहणार नाही." मनसे जिल्हाध्यक्ष परब यांनी श्री. राणे यांचा प्रचार उत्साहात सुरू आहे. गावपातळीवर प्रचाराच्या दोन फेऱ्या पूर्ण झाल्या असून सर्व कार्यकर्ते मोठ्या उत्साहाने एक दिलाने काम करत असल्याचे सांगितले.