‘महाज्योती’च्या २० जणांना मिळणार वैमानिक प्रशिक्षण

‘महाज्योती’च्या २० जणांना
मिळणार वैमानिक प्रशिक्षण

सकाळ वृत्तसेवा
सिंधुदुर्गनगरी, ता. ३० ः महात्मा जोतिबा फुले संशोधन व प्रशिक्षण संस्था (महाज्योती), नागपूर संस्थेमार्फत नागपूर फ्लाईंग क्लब, नागपूरसोबत ‘महाज्योती’च्या लाभार्थ्यांना व्यावसायिक वैमानिक प्रशिक्षण देण्यासाठी २६ फेब्रुवारी २०२१ ला करार केला आहे. त्यानुसार २० विद्यार्थ्यांना व्यावसायिक वैमानिक प्रशिक्षण देण्यासाठी महाज्योतीमार्फत विद्यार्थी व प्रशिक्षण शुल्क नागपूर फ्लाईंग क्लब, नागपूर उपलब्ध करून दिले आहे. सामंजस्य करारानुसार प्रशिक्षण देण्याची संपूर्ण जबाबदारी ही नागपूर फ्लाईंग क्लब या संस्थेची आहे.
महाज्योतीच्या प्रशिक्षणात अभ्यासक्रम वेळेत पूर्ण होत नसल्याबाबतची तक्रार सहभागी विद्यार्थ्यांनी २३ ऑक्टोबर २०२३ ला कार्यालयाकडे केली होती. याबाबत ३० ऑक्टोबर २०२३ ला नागपूर फ्लाईंग क्लब, नागपूरचे सर्व संबंधित अधिकारी, महाज्योतीचे अधिकारी व विद्यार्थ्यांची बैठक पार पडली. या बैठकीत प्रशिक्षणाचा कालबद्ध कार्यक्रम राबविण्याबाबत व विद्यार्थ्यांच्या सर्व समस्यांचे निवारण करण्याबाबत व्यवस्थापकीय संचालक, नागपूर फ्लाईंग क्लब, नागपूर यांनी विद्यार्थ्यांना आश्वस्त केले होते. याबाबत महाज्योतीच्या प्रशिक्षणार्थींनी १२ एप्रिल २०२३ ला प्रशिक्षण अभ्यासक्रम व विमान उड्डाण प्रात्यक्षिक विहित कालावधीत पूर्ण करण्याच्या अनुषंगाने आवश्यक उपाययोजना करण्याबाबत नागपूर फ्लाईंग क्लब, नागपूर यांना सूचना देण्याबाबत कार्यालयास निवेदन दिले होते. याअनुषंगाने कार्यालयाने प्रशिक्षण कार्यक्रम विहित कालावधीत पूर्ण करण्यासाठी आवश्यक उपाययोजना करण्याबाबतचे पत्र व्यवस्थापकीय संचालक, नागपूर फ्लाईंग क्लब, नागपूर यांना दिले आहे. तसेच वरिष्ठांनाही याप्रकरणी उपाययोजना करण्यासाठी बैठक आयोजित करण्याबाबत महाज्योतीने विनंती केली आहे. विद्यार्थ्यांचे प्रशिक्षण पूर्ण करून घेण्याच्या दृष्टीने महाज्योती संस्थेमार्फत आवश्यक सर्व पाठपुरावा करण्यात येत असल्याचे महाज्योतीचे व्यवस्थापकीय संचालक राजेश खवले यांनी सांगितले.