शहरात आघाडीला मिळणार मताधिक्य

१९ ( पान ३ )
-----------

चिपळुणात आघाडीला मताधिक्य
मिळणार ः लियाकत शाह

सकाळ वृत्तसेवा
चिपळूण, ता. ११ : लोकसभा निवडणुकीसाठी चिपळूण शहरातील ४० केंद्रांवर ५९ टक्के मतदान झाले आहे. यामध्ये महाविकास आघाडीचे उमेदवार विनायक राऊत यांना किमान आठ हजाराचे मताधिक्य मिळणार,असा दावा काँग्रेसचे शहराध्यक्ष लियाकत शाह यांनी पत्रकारांशी बोलताना व्यक्त केला.
ते म्हणाले, चिपळूण शहरातील मतदारांनी या वेळी उत्स्फूर्त प्रतिसाद दाखवला. सकाळपासूनच शहरातील ४० मतदान केंद्रावर रांगा लागलेल्या दिसून येत होत्या. विशेष म्हणजे मतदानासाठी महिलांचा सहभाग लक्षणीय दिसत होता तर नव मतदारांनीदेखील आवर्जून हजेरी लावून मतदानाचा हक्क बजावला. या वेळची लोकसभा निवडणूक ही व्यक्तीशः उमेदवारांसाठी न होता संविधान आणि लोकशाही वाचवण्यासाठी झाली. त्याची चुणूक चिपळूण शहरातील प्रत्येक केंद्रावर दिसून आली. या निवडणुकीच्या निमित्ताने शहरात आधीपासूनच भाजपविरोधी वातावरण होते. त्यात प्रामुख्याने धोक्यात असलेले संविधान, लोकशाही, बेरोजगारी आणि महागाई आदी मुद्‌‍द्यांवर मतदार चर्चा करत होते. अशा परिस्थितीत विरोधी पक्षाकडून मतदारांना आकर्षित करण्यासाठी विविध आमिषेदेखील दाखवली गेली; मात्र, या निवडणुकीत संविधान, बेरोजगारी आणि महागाई हे कळीचे मुद्दे ठरले.
मुळात भाजपच्या राजवटीत सुरवातीपासून घोटाळे, गैरव्यवहार, भ्रष्टाचार, ईडी, इन्कम टॅक्स, सीबीआय आणि राजकीय नेत्यांना तुरुंगवास, असे शब्द मतदारांच्या कानावर कायम पडत होते. त्याची मतदारांमध्ये मोठी चीड निर्माण झाली होती. त्या भावनेतून मतदार बाहेर पडले आणि तितक्याच उत्स्फूर्तपणे मतदान झाले. चिपळूण शहरात महाविकास आघाडीचे उमेदवार विनायक राऊत यांना आठ हजारांची आघाडी मिळणार, असे शाह यांनी सांगितले.