शिवडाव-बौद्धवाडीत २३ ला जिल्हास्तरीय नृत्य स्पर्धा

शिवडाव-बौद्धवाडीत २३ ला
जिल्हास्तरीय नृत्य स्पर्धा

सकाळ वृत्तसेवा
कुडाळ, ता. ११ ः सम्यक समाज प्रबोधिनी, शिवडाव-बौद्धवाडी (रजि.) यांच्यातर्फे भारतीय बौद्ध महासभा मुंबई, गावशाखा शिवडाव, तसेच शिवडाव बौद्ध विकास संघ मुंबई, गावशाखा शिवडाव यांच्या संयुक्त विद्यमाने अखिल विश्वाला शांतीचा संदेश देणारे तथागत भगवान गौतम बुद्ध, महाराष्ट्राचे आराध्य दैवत छत्रपती शिवाजी महाराज आणि विश्वरत्न डॉ. बाबासाहेब आंबेडकर यांची संयुक्त जयंती महोत्सव २२ व २३ मे रोजी शिवडाव-बौद्धवाडी येथे साजरा करण्यात येणार आहे.
या महोत्सवाच्या निमित्ताने २३ ला जिल्हास्तरीय रेकॉर्ड डान्स स्पर्धेचे आयोजन केले आहे. जिल्ह्यातील सर्व डान्स स्पर्धकांनी अधिकाधिक संख्येने या स्पर्धेमध्ये सहभाग घ्यावा, असे आवाहन आयोजकांनी केले आहे. ही रेकॉर्ड डान्स स्पर्धा लहान गट (१ ते १४ वयोमर्यादा) व खुला (वयोमर्यादा १५) या दोन गटांमध्ये होणार आहे. लहान गट प्रथम २५०० रुपये, द्वितीय १५००, तृतीय १००० रुपये व प्रत्येकी सन्मानचिन्ह आणि प्रशस्तिपत्र, खुल्या गटासाठी प्रथम ३७०० रुपये, द्वितीय २५००, तृतीय १५०० रुपये, प्रत्येकी सन्मानचिन्ह आणि प्रशस्तिपत्र अशी बक्षिसे देण्यात येणार आहेत. सर्व स्पर्धकांना सहभाग प्रशस्तिपत्र देण्यात येईल. सर्व इच्छुक स्पर्धकांनी अधिकाधिक संख्येने सहभाग घेऊन सहकार्य करावे. लहान गटातील स्पर्धकांनी वयाच्या पुराव्यासाठी आधार कार्ड घेऊन येणे आवश्यक आहे. अधिक माहितीसाठी राकेश कदम, सचिन पवार, संजय पवार यांच्याशी संपर्क साधावा, असे आवाहन केले आहे.