पारंपरिक ढोलवादन स्पर्धेत फणसवणे प्रथम

13 (टूडे 3 साठी)

- rat13p1.jpg-
24M83272
फणसवणेतील ढोलवादन स्पर्धेत सहभागी स्पर्धक.

पारंपरिक ढोलवादन स्पर्धेत फणसवणे संघ प्रथम

नवलाई मित्रमंडळातर्फे आयोजन; हेंदली द्वितीय तर मलदोबा तिसरा क्रमांक

सकाळ वृत्तसेवा
संगमेश्वर, ता. १३ ः नवलाई मित्रमंडळ कळंबस्ते तेलेवाडीतर्फे भरवण्यात आलेल्या पारंपरिक ढोलवादन स्पर्धेत वाघजाई मित्रमंडळ फणसवणे संघाने प्रथम, हेंदली संघाने द्वितीय तर मलदोबा संघ तिसऱ्या क्रमांक पटकावला.
संगमेश्वर तालुक्यातील तेलेवाडी येथे श्री सत्यनारायणाची महापूजा झाली. यानिमित्त कळंबस्ते नवलाई मित्रमंडळाने पारंपरिक ढोलवादन स्पर्धा आयोजित केली होती. ग्रामीण भागातील नष्ट होत चाललेले पारंपरिक खेळ, मर्दानी खेळ यांचे आयोजन करून परंपरा जतन करण्याचा प्रयत्न मंडळाने केला आहे. पहिल्या वर्षी ताशेवादन, गतवर्षी लाठीकाठी स्पर्धा घेण्यात आल्या होत्या तर नुकतीच पारंपरिक लाकडी ढोलवादन स्पर्धा घेण्यात आली. या वेळी पंचक्रोशीतील अनेक संघांनी सहभाग नोंदवला. या स्पर्धेचे उद्घाटन संगमेश्वर पोलिस ठाण्याचे पोलिस उपनिरीक्षक नागरगोजे यांच्या झाले. या प्रसंगी खातू म्हणाले, ढोलवादन हे पूर्वपार शिवकालीन असून, त्यापूर्वीही ढोलवादन होत होते. आता या वादनात ताशाने प्रवेश केल्याने या पारंपरिक वादनाचा नाद बदलत चालला आहे. आज ढोलवादन मागे पडत असून, सध्या पुणेरी ढोल आणि नाशिक ढोल याचे आकर्षण अधिक असल्याने कोकणी ढोल स्पर्धेतून मागे पडत चालला असल्याचे सांगून या वादनात कोठेतरी शिस्तबद्धता यावी म्हणून पूणे येथे १९६० ला गणपती उत्सवात अप्पा पेंडसे यांनी ढोलपथकाची स्थापना केली. आज नाशिक आणि पुणे ढोलपथकात हजारो तरुण-तरुणी आपले करिअर करत आहेत; मात्र कोकणी पारंपरिक ढोलवादनाला व्यासपीठ मिळावे म्हणून केलेला हा प्रयत्न असल्याची माहिती दिली. ढोलवादन स्पर्धेत वाघजाई मित्रमंडळ फणसवणेने प्रथम क्रमांक पटकावला. हेंदली संघाने द्वितीय तर मलदोबा संघ तिसऱ्या क्रमांकाचे मानकरी ठरले. सर्व विजेत्या संघांना मान्यवरांच्या हस्ते रोख रक्कम आणि सन्मानचिन्ह देऊन गौरवण्यात आले. या वेळी पंच म्हणून संगमेश्वरचे सुनील इंदुलकर, सोनगिरीचे अजिंक्य रसाळ यांनी काम पहिले. कार्यक्रमाचे सूत्रसंचालन खातू, संतोष नेवरेकर यांनी केले.
----------