निवतीत साई मंदिर वर्धापन दिन सोहळा

निवतीत साई मंदिर
वर्धापन दिन सोहळा
म्हापण ः निवती येथील साईबाबा मंदिराचा २१ व्या वर्धापन दिन सोहळ्यास आजपासून प्रारंभ झाला. यानिमित्त बुधवारपर्यंत (ता. १५) विविध कार्यक्रम आयोजित केले आहेत. आज सकाळी अभ्यंगस्नान, लघुरुद्र, नामस्मरण, दुपारी आरती, तीर्थप्रसाद, सायंकाळी पादुका मिरवणूक व दिंडी, रात्री भजने आदी कार्यक्रम झाले. उद्या (ता. १४) सकाळी १०.३० वाजता महिला हरिपाठ, दुपारी २ वाजता श्रींची महापूजा, सायंकाळी ४ वाजता हळदीकुंकू समारंभ, ७ वाजता भजने, रात्री ९ वाजता दत्तमाऊली दशावतार नाट्य मंडळाचे नाटक, बुधवारी (ता. १५) पहाटे ४ वाजता काकड आरती, सकाळी १०.३० वाजता हरिपाठ, दुपारी १२ वाजता साईभंडारा व महाप्रसाद, सायंकाळी ७ वाजता भजने, रात्री ९ वाजता चिमणी पाखरं डान्स अॅकॅडमी, कुडाळचा ‘जलवा’ कार्यक्रम होणार आहे. लाभ घेण्याचे आवाहन साई निवती मेढा ग्रामस्थ मंडळाने केले आहे.
--
सावंतवाडी शहरात
गव्यारेड्यांचा वावर
सावंतवाडी ः शहरात गवारेडे लोकवस्तीत गव्यांच्या वावराने नागरिकांत भीतीचे वातावरण पसरले आहे. वनखाते फटाके वाजवून गव्यांवा पळवून लावण्याचा प्रयत्न करत आहे. गेल्या काही वर्षांपासून जंगलातील झाडांची कत्तल मोठ्या प्रमाणात वाढली आहे. वन्यप्राण्यांना जंगलात पाणी व अन्न मिळत नाही. अन्न साखळीतील वन्यजीव देखील जंगलात नसल्याने वन्यप्राणी लोकवस्तीमध्ये घुसतात, असे चित्र आहे. गव्यांना जंगलात खाद्य व पाणी मिळवून देण्यासाठी वनविभागाने प्रयत्न करावेत, अशी मागणी नागरिकांतून होत आहे.
---
सेवानिवृत्त संघटनेची
मासिक सभा स्थगित
सावंतवाडी ः सध्या मे महिन्यात कडक उन्हाळा असल्याने या महिन्यात होणारी संघटनेची मासिक सभा स्थगित करण्यात आली आहे. संघटनेच्या सर्व ज्येष्ठ सभासदांनी नोंद घ्यावी, असे आवाहन सावंतवाडी-दोडामार्ग तालुका सेवानिवृत्त संघटनेचे पदाधिकारी संभाजी कांबळे यांनी केले आहे. मेमध्ये अतिउष्मा असल्याच्या कारणास्तव संघटनेची मासिक सभा स्थगित ठेवण्यात आली आहे.
--
कुणकेरी येथे आज
‘भजनारंग’ कार्यक्रम
ओटवणे ः कुणकेरी श्री भवानी मंदिर येथे उद्या (ता. १४) सायंकाळी ५ वाजता ‘भजनारंग’ हा संगीतमय कार्यक्रम होणार आहे. पखवाज अलंकार महेश सावंत प्रस्तुत श्री जगन्नाथ संगीत विद्यालयाच्या कार्यक्रमाचा लाभ घ्यावा, असे आवाहन करण्यात आले आहे.