दुचाकीस्वार महिलेची वृद्धाला धडक

पान ३

दुचाकीस्वार महिलेची वृद्धाला धडक
रत्नागिरी ः शहराजवळील नाचणे-सुपलवाडी येथील रस्त्यावर दुचाकीवरुन जाणाऱ्या अज्ञात महिलेने पादचारी वृद्धाला धडक दिली. अज्ञात महिलेविरुद्ध शहर पोलिस ठाण्यात गुन्हा दाखल करण्यात आला आहे. ही घटना गुरुवारी (ता. २) सकाळी नाचणे-सुपलवाडी रस्त्यावर बाईंग स्टॉप येथे घडली. पोलिसांकडून मिळालेल्या माहितीनुसार जखमी वृद्ध शरद तुकाराम सावंत (वय ७५, रा. नाचणे शांतीनगर, रत्नागिरी) हे नाचणे-सुपलवाडी ते बाईंगस्टॉप असे चालत जात असताना संशयित महिला दुचाकी घेऊन जात असताना काजरघाटी दिशेकडून येणाऱ्या सफेद रंगाच्या दुचाकीवरील महिलेने सावंत यांना मागून धडक दिली व न थांबता ती निघून गेली. या अपघातात सावंत यांना गंभीर दुखापत झाली. या प्रकरणी पोलिस हेड कॉन्स्टेबल संतोष गायकवाड यांनी शहर पोलिस ठाण्यात तक्रार दिली. तक्रारीवरून पोलिसांनी संशयित महिलेविरुद्ध गुन्हा दाखल केला आहे.

विषारी द्रव प्यायलेल्या विवाहितेचा मृत्यू
रत्नागिरी ः गुहागर तालुक्यातील पालशेत येथे बागकाम करणाऱ्या विवाहितेने विषारी द्रव प्यायले केले. अधिक उपचारासाठी जिल्हा शासकीय रुग्णालयात दाखल केले असता उपचार दरम्यान मंगळवारी (ता. १४) पहाटे चारच्या सुमारास तिचा मृत्यू झाला. सुजाता सुधीर पवार (वय २७, रा. कोळकेवाडी-चिपळूण) असे मृत विवाहितेचे नाव आहे. ही घटना सोमवारी (ता. १३) घडली होती. पोलिसांकडून मिळालेल्या माहितीनुसार सुजाता व तिचे पती सुधीर पवार गुहागर पालशेत येथे माधव सुर्वे यांच्या बागेत कामाला होते. सोमवारी सुजाता हिने कोणत्यातरी अज्ञात कारणातून विषारी द्रव प्यायले होते. तिला तातडीने कामथे येथील रुग्णालयात दाखल केले होते. अधिक उपचारासाठी जिल्हा रुग्णालयात दाखल केले होते. उपचार सुरू असताना मंगळवारी पहाटे तिचा मृत्यू झाला. जिल्हा रुग्णालयाच्या पोलिस चौकीत नोंद करण्यात आली आहे.