तळेरेत नानिवडेकरांना ''गझलमय'' आदरांजली

८४५७१

तळेरेत नानिवडेकरांना ‘गझलमय’ आदरांजली
जयंतीदिनी अभिवादन : कविता, गझल सादरीकरणासह स्मृतींना उजाळा
सकाळ वृत्तसेवा
तळेरे, ता. १९ : दिवंगत ज्येष्ठ कवी, गझलकार, पत्रकार मधुसूदन नानिवडेकर यांच्या जयंतीनिमित्त तळेरे येथे ''नानिवडेकर, गझला आणि आठवणी''या कार्यक्रमाचे आयोजन करण्यात आले होते. या वेळी कवी, अभिनेते प्रमोद कोयंडे यांनी नानिवडेकर यांच्या विविध गझल सादर केल्या.
तळेरे येथील चैतन्य नर्सिंग होमच्या प्रांगणातील ‘मधुकट्टा’ येथे पुष्पहार अर्पण करून नानिवडेकर यांना अभिवादन करण्यात आले. त्यांच्या स्मृती जागवण्यासाठी नानिवडेकर यांच्या गझला आणि कवितांचे सादरीकरण कवी, गझलकार प्रमोद कोयंडे यांनी केले.
मधुसूदन नानिवडेकर यांचे शेवटची चार वर्षे तळेरे येथे वास्तव्य होते. इतर ठिकाणांपेक्षा तळेरे येथे ते अधिक रमले होते. शिवाय तळेरे येथील सांस्कृतिक, पत्रकार क्षेत्रात ते मार्गदर्शन करत होते. नानिवडेकर यांचा १८ मे हा जन्म दिवस. त्यांचा जन्मदिन तळेरे पंचक्रोशी पत्रकार मित्र परिवाराच्या वतीने दरवर्षी त्यांच्या उपस्थितीत तळेरे येथे साजरा केला जात असे. त्यांच्या निधनानंतर हा दिवस जयंती दिन म्हणून साजरा करून त्यांना अभिवादन करण्यात येते.
नानिवडेकर यांच्या स्मृती जागवण्यासाठी त्यांच्या गझला आणि कवितांचे सादरीकरण कवी, अभिनेते प्रमोद कोयंडे यांनी केले. हा कार्यक्रम मधुकट्ट्यावरील अभिवादनानंतर श्रावणी कॉम्प्युटर सेंटरच्या सभागृहात प्रज्ञांगण, संवाद परिवार, अक्षरोत्सव परिवार, तळेरे पंचक्रोशी पत्रकार मित्र परिवाराच्या वतीने आयोजित करण्यात आला होता. यावेळी ‘संवाद परिवारा’चे संजय खानविलकर, प्रज्ञांगणचे सतीश मदभावे, अक्षरोत्सव परिवाराचे निकेत पावसकर, तळेरे पंचक्रोशी पत्रकार मित्र परिवाराचे अध्यक्ष उदय दुधवडकर आदी उपस्थित होते. निकेत पावसकर यांनी कवी नानिवडेकर यांची ओळख करून देताना विविध आठवणी जागविल्या. सतीश मदभावे यांनी मनोगत व्यक्त केले. रोशनी बागवे यांनी संपूर्ण कार्यक्रमाचे सूत्रसंचालन करून आभार मानले.

चौकट
गझल आणि आठवणी
यावेळी प्रमोद कोयंडे यांनी नानिवडेकर यांच्या गझला सादर करताना त्या गझलांमागील अर्थ, काही आठवणी, किस्से सांगितले. अनेक गझला, कवितांमधून नानिवडेकर किती सहजतेने अनेक भावना मांडायच्या, हे त्यांनी विशद केले. यावेळी ‘तुझी याद येते वेळीअवेळी’, ‘हरकत नाही’, ‘घर’, ‘ठरावाप्रमाणे’, ‘तू आल्यावर’, ‘भलभलते’ या नानिवडेकर यांच्या गझलांसह कोयंडे यांनी ‘हरकत आहे’ ही स्वरचित रचनाही सादर केली.