सावंतवाडी शहरातील धोकादायक झाड हटवा

85344

सावंतवाडी शहरातील
धोकादायक झाड हटवा
राजू बेगः पालिकेस निवेदन
सकाळ वृत्तसेवा
सावंतवाडी, ता. २३ः शहरातील रस्त्यालगतचे धोकादायक असलेले झाड तत्काळ तोडावे, अशी मागणी माजी नगरसेवक राजू बेग यांनी सावंतवाडी नगरपालिकेचे मुख्याधिकारी सागर साळुंखे यांच्याकडे निवेदनाद्वारे केली आहे. बेग यांनी निवेदनात म्हटले आहे की, सावंतवाडी पालिका हद्दीमध्ये माठेवाडा काझीदिंडी परिसरात वागळे दुकाननजिक मुंबई स्थित महम्मद रफिक काझी यांच्या मालकीच्या जागेत एक आंब्याचे झाड अत्यंत जीर्ण झाले आहे. हे झाड रस्त्यालगत धोकादायक स्थितीत असल्याने ते तात्काळ तोडून घेण्याबाबत तेथील नागरिकांची मागणी आहे. नागरिकांच्या जीवितास धोका असल्याने त्यांच्या मागणीनुसार १५ जून २०२३ ला याबाबत अर्जाद्वारे पालिकेचे लक्ष वेधले होते. त्यानंतर झाडाचे मालक महम्मद काझी यांना ३ जुलै २०२३ च्या पत्राने पालिका प्रशासनाने कळविलेले होते; परंतु अद्यापपर्यंत या झाडाबाबत कोणतीच उपाययोजना करण्यात आल्याचे दिसून येत नाही. आता पावसाळा तोंडावर आल्याने झाड मोडून अथवा कोसळून जीवित व वित्तहानी होण्याची शक्यता नाकारता येत नाही. हे झाड मोडून जीवित व वित्तहानी झाल्यास त्यास सर्वस्वी नगरपालिका जबाबदार राहील, असा इशारा बेग यांनी निवेदनाद्वारे दिला आहे.