पावसाळ्यातील आपत्तींबाबत तातडीने उपाययोजना करा

पावसाळ्यातील आपत्तींबाबत
तातडीने उपाययोजना करा
राजेंद्र पेडणेकरः प्रशासनास निवेदन
सकाळ वृत्तसेवा
कणकवली, ता. २३ः सिंधुदुर्ग जिल्ह्यात पावसाळ्यात आपत्तीच्या घटना घडतात. यंदाच्या पावसाळ्यात या घटना टाळण्यासाठी जिल्हा प्रशासनाने तत्काळ उपाययोजना कराव्यात, अशी मागणी माऊली मित्रमंडळाचे अध्यक्ष राजेंद्र पेडणेकर यांनी निवेदनाद्वारे केली आहे.
पावसाळा सुरू झाल्यानंतर जिल्ह्यात दरड कोसळणे, पूर येणे, झाडे पडणे, विद्युत खांब व तारा तुटणे यांसह अन्य आपत्तीच्या घटना घडतात. या घटना घडू नयेत, म्हणून जिल्हा प्रशासनाने उपाययोजना करणे आवश्यक आहे. दरड दुर्घटना टाळण्यासाठी संभाव्य ठिकाणांची संबंधित यंत्रणेने पाहणी करून उपाययोजना करणे गरजेचे आहे. वर्षा पर्यटनासाठी पर्यटक जिल्ह्यात येतात. पर्यटकांना पर्यटनस्थळी सोयीसुविधा उपलब्ध करून देणे गरजेचे असून, पर्यटन स्थळापर्यंत जाणारे मार्ग सुरक्षित असणे महत्त्वाचे आहे. जिल्ह्यात येणारे घाटमार्ग, रेल्वे रुळांच्या आसपासच्या परिसरातील डोंगर, टेकड्या, दुर्गम भागातील विविध वस्ती वाड्यांतील दरड कोसळण्याचे धोके असलेली ठिकाणे पावसाळ्यापूर्वीच हेरून तेथे दरड कोसळू नये, म्हणून प्रतिबंधात्मक उपाययोजना तातडीने कराव्यात. आपत्ती ओढवल्यास तत्काळ मदतकार्यासाठी सक्षम यंत्रणा उभारण्यात यावी, अशी मागणी पेडणेकर यांनी केली आहे.