आंबेरकर कुटुंबियांना मदत

आंबेरकर कुटुंबीयांना
कुसुमताई पतसंस्थेची मदत

पावस ः रत्नागिरी तालुक्यातील गावडेआंबेरे आंबेरकरवाडी येथील महादेव शंकर आंबेरकर यांचे मच्छीमार बोट बुडून त्यात निधन झाले. त्यामुळे त्याच्या कुटुंबावर संकट निर्माण झाल्यामुळे पावस येथील कुसुमताई पतसंस्थेतर्फे त्यांच्या कुटुंबांना आर्थिक मदत देण्यात आली. यावेळी कुसुमताई पतसंस्थेचे शाखा अधिकारी नितीन गुळेकर, कर्मचारी अजय पानगले, गावडेआंबेरे सरपंच लक्ष्मण सारंग, माजी सरपंच रामचंद्र आंबेरकर, असलम काझी, जनार्दन सारंग, सुरेश सारंग वसंत नाटेकर आदी उपस्थित होते
---------

प्राचार्य मेहेंदळे यांचा
सेवानिवृत्तीनिमित्त सत्कार

चिपळूण : तालुक्यातील मार्गताम्हाने येथील डॉ. तात्यासाहेब नातू महाविद्यालयाचे प्राचार्य विकास माधव मेहेंदळे हे ३१ मे रोजी सेवानिवृत्त झाले. त्यांचा महाविद्यालयाच्या वतीने सपत्नीक सत्कार करण्यात आला. मार्गताम्हानेत महाविद्यालयात जुलै १९९३ सेवेत रुजू झालेले श्री. मेहेंदळे हे मुंबई विद्यापीठात इतिहास अभ्यास मंडळ सदस्य, कोकण इतिहास परिषद व इतिहास संकलन समिती, अखिल भारतीय विद्यार्थी परिषदेत कार्यरत आहेत. कार्यक्रमाला प्राचार्या डॉ. संगीता काटकर, संस्थेचे संचालक, प्राध्यापक व शिक्षकेतर कर्मचारी उपस्थित होते.
------------

आव्हाडाविरोधात
निषेध आंदोलन

साडवली ः देवरूख येथे भाजपने आमदार जितेंद्र आव्हाड यांचा निषेध केला. आमदार जितेंद्र आव्हाड यांनी डॉ. बाबासाहेब आंबेडकर यांची प्रतिमा फाडून समस्त देशवासीयांचा अपमान केला आहे. त्याबद्दल त्यांचा जाहीर निषेध म्हणून देवरुख येथे भाजपतर्फे देवरुख येथील डॉ. आंबेडकर यांच्या पुतळ्याला पुष्पहार घालून मानवंदना देण्यात आली. त्यानंतर देवरूख पोलिस ठाण्यात आमदार जितेंद्र आव्हाड यांच्यावर गुन्हा दाखल व्हावा म्हणून निवेदन देण्यात आले. तसेच आव्हाड यांच्या प्रतिकात्मक पुतळ्याला जोडे मारुन निषेध आंदोलन करण्यात आले. या वेळी संगमेश्वर दक्षिण तालुकाध्यक्ष रुपेश कदम, देवरुख शहराध्यक्ष सुशांत मुळे, जिल्हा सदस्य सुधीर यशवंतराव, युवा मोर्चा तालुकाध्यक्ष प्रथमेश धामणस्कर आदी उपस्थित होते.
--------------