पावस-मावळंगेत आंबा बागेला भीषण आग

87306
87308
87307

मावळंगेत आंबा बागेला भीषण आग
दोन बागायतदारांना फटका; साडेसातशे कलमे खाक, लाखोंचे नुकसान
पावस, ता. २ः रत्नागिरी तालुक्यातील मावळंगे लोहारवाडी परिसरातील हापूस आंब्याच्या बागेला आग लागल्याने सुमारे ७०० कलमांना आगीची झळ पोचली आहे. यामध्ये लाखो रुपयांचे नुकसान झाले आहे. या दोन आंबा बागायतदारांचा समावेश आहे.
पावसजवळील मावळंगे-लोहारवाडी येथे भिकाजी तावडे यांची आंबा कलमांची बाग आहे. त्या बागेला शनिवारी (ता. १) दुपारी दीडच्या सुमारास आग लागली. दुपारी अडीच वाजता आंबा बागायतदार आणि ग्रामस्थांना आग लागल्याचे समजल्यानंतर त्यांनी बागेकडे धाव घेतली. बागेजवळ पोचेपर्यंत सुमारे ८०० आंबा कलमे आगीत भस्मसात झाली होती. ग्रामस्थांच्या मदतीने सुमारे तीन तासानंतर आग नियंत्रणात आणण्यात यश आले. तावडे यांच्या शेजारी असलेल्या प्रवीण गजने यांचीही ६० कलमे या आगीत खाक झाली.
हा परिसर कातळभाग असल्याने अनेक ठिकाणी गवत वाढले आहे. उष्णतेमुळे हे गवत सुकले आहे. त्यामुळे लागलेली आग मोठ्या प्रमाणात पसरली. विद्युतवाहिन्या या परिसरात नसल्याने शॉर्टसर्किटमुळे आग लागली असल्याची शक्यता नाही. त्यामुळे आग लागली कशी, असा प्रश्न बागायतदार तावडेसह ग्रामस्थांना पडला आहे.