चिपळुणात गटारांवरील अतिक्रमणे हटवली

87546

चिपळुणात गटारांवरील अतिक्रमणे हटवली
पालिकेकडून स्वच्छता ; व्यापाऱ्यांचे सहकार्य
चिपळूण, ता. ३ ः नुकत्याच पार पडलेल्या मान्सूनपूर्व आढावा बैठकीत चिपळूण बाजारपेठेतील गटारांची स्वच्छता करण्याची मागणी व्यापाऱ्यांनी केली होती. त्याची दखल घेत मुख्याधिकारी विशाल भोसले यांच्या मार्गदर्शनाखाली पालिकेच्या आरोग्य विभागाने सोमवारी शहर व बाजारपेठेतील गटारांच्या स्वच्छतेचे काम हाती घेतले. गटारांवरील कडप्पे, लेंटल, बांधकामे काढून केलेले अतिक्रमण देखिल हटविण्यात आले.
चिपळूण पालिकेकडून मान्सूनपूर्व कामांची लगबग सुरू आहे. शहरातील नाले, पऱ्हे, गटारांची साफसफाई केली जात आहे. चिपळूण बाजारपेठेत रस्त्यालगत गटार आहे. दुकानदार, व्यावसायिकांनी या गटारांवर कडप्पे, लेंटल तर काही ठिकाणी बांधकामे करून ती गटारे झाकली होती. त्यामुळे सफाई कामगारांना या गटारांची साफसफाई करताना अडचणी निर्माण होत होत्या. गटारात प्लास्टिक बॉटल्स, मातीसह अन्य कचरा अडकला होता. यामुळे पावसाळ्यात पाण्याचा निचरा होणे अवघड बनले होते. हे गटारातील पाणी रस्त्यावर व दुकानांमध्ये शिरण्याची शक्यता होती. तुंबलेल्या गटारामुळे डासांचे प्रमाण वाढून नागरिकांचे आरोग्य धोक्यात येण्याची भीती निर्माण झाली होती. नुकतीच इंदिरा गांधी सांस्कृतिक केंद्र येथे चिपळूण पालिकेने मान्सूनपूर्व नियोजन बैठक घेतली. त्यामध्ये बाजारपेठेतील तुंबलेल्या गटारांचा विषय समोर आला. या गटारांची तातडीने साफसफाई करावी, अशी मागणी व्यापाऱ्यांनी केली होती. मात्र गटारांवर टाकण्यात आलेले कडप्पे, लेंटल यामुळे गटारांची स्वच्छता करता येत नसल्याची माहिती अधिकाऱ्यांनी दिली. त्यावर व्यापारी संघटनेने गटारांची सफाई करा, जिथे जिथे अतिक्रमण झाले असेल ते तोडा अशा सूचना केल्या होत्या.
त्यानुसार मुख्याधिकारी विशाल भोसले, प्रशासकीय अधिकारी मंगेश पेढांबकर, कार्यालयीन अधीक्षक अनंत मोरे, आरोग्य विभाग प्रमुख वैभव निवाते, आरोग्य निरीक्षक महेश जाधव यांच्या मार्गदर्शनाखाली सफाई कामगारांनी सोमवारी सकाळपासून बाजारपेठेतील गटारांची स्वच्छता मोहीम हाती घेतली.
पहिल्या टप्प्यात शहरातील चिंचनाका ते बाजारपेठेतील डायमंड कॉम्प्लेक्स परिसरापर्यंतच्या गटारातील गाळ काढण्यात आला आहे. यासाठी गटारांवरील कडप्पे, लेंटल यांच्यासह कच्ची व पक्की बांधकामेही तोडण्यात आली. गटारांतून मोठ्या प्रमाणावर माती, कचरा व प्लास्टिक बॉटल्स जमा झाल्या होत्या. त्या काढण्यात आल्या.