डंपरच्या धडकेत दुचाकीस्वार ठार

डंपरच्या धडकेत
दुचाकीस्वार ठार
खेडः मुंबई-गोवा महामार्गावरील पीरलोटे चिरणी मार्गावर डंपरने दुचाकीला पाठीमागून दिलेल्या धडकेत दुचाकीस्वार जागीच ठार झाला. हा अपघात २ जूनला झाला. या प्रकरणी डंपर चालकावर गुन्हा दाखल केला आहे. लक्ष्मण मनोहर वेळवी (वय ४२, सध्या रा. चिरणी) असे मृत स्वाराचे नाव आहे. या प्रकरणी महेश मनोहर वेळवी (३८, रा. चिरणी) यांनी तक्रार दाखल केली असून डंपरचालक चंदू दौडामणी (रा. वालोपे, चिपळूण) याच्यावर गुन्हा दाखल केला आहे. लक्ष्मण मनोहर वेळवी (४२) हे दुचाकीने (एमएच-१२-जेबी-८९२८) पीर लोटे ते लोटे गावठाणवाडी असे जात होते. त्यावेळी चिरणीकडे जाणाऱ्या रस्त्यावरील निवाचा कडेजवळ डंपरने (एमएच-०८-एपी-१७०७) लक्ष्मण याच्या दुचाकीला पाठीमागून धडक दिली. अपघातात त्याच्या डोक्यावरुन डंपरचे चाक गेल्याने तो जागीच ठार झाला. याप्रकरणी डंपरवरील चालक चंदु दौडामणी याच्याविरुद्ध गुन्हा दाखल केला आहे.
------
खेडमध्ये हातभट्टीच्या
दारूधंद्यावर धाड
खेडः शहरातील नगरपालिका कर्मचारी वसाहतीच्या पाठीमागे एका झाडाखाली बेकायदेशीरपणे सुरू असलेल्या गावठी हातभट्टीच्या दारूधंद्यावर येथील पोलिसांनी धाड टाकली. या धाडीत ३ हजार ४२० रुपयांचा माल पोलिसांनी जप्त केला. याप्रकरणी सिद्धेश वैभव खामकर याच्यावर येथील पोलिस ठाण्यात गुन्हा दाखल झाला आहे.