कसई-धाटवाडी येथे दारू अड्ड्यावर छापा

कसई-धाटवाडी येथे
दारू अड्ड्यावर छापा

दोडामार्ग पोलिसांत दोघांवर गुन्हा

सकाळ वृत्तसेवा
दोडामार्ग, ता. ५ ः कसई-धाटवाडी येथे अवैध दारू अड्ड्यावर येथील पोलिसांनी सोमवारी (ता. ३) रात्री सव्वा दहाच्या सुमारास छापा टाकला. या प्रकरणी दोघांना ताब्यात घेत गुन्हा दाखल केला. जानू पदू कोळेकर (वय ५८) व संतोष रामचंद्र वडर (वय २९, दोघेही रा. कसई-धाटवाडी) अशी संशयितांची नावे असून त्यांच्याकडून १० हजार पन्नास रुपयांच्या अवैध दारुसह २३ हजार ७५० रुपयांचा मुद्देमाल जप्त करण्यात आला.
येथील पोलिसांनी अवैध दारू अड्ड्यांवरील कारवाईची मोहिम हाती घेतली आहे. सोमवारी सायंकाळी साटेली-भेडशी येथील आवाडे येथे दोन दारू अड्ड्यांवर स्थानिक पोलिस व एलसीबीने संयुक्तरीत्या कारवाई केली. कसई-धाटवाडी येथे रात्री १० वाजण्याच्या सुमारास अजून एक कारवाई केली. पोलिसांना मिळालेल्या गोपनीय माहितीच्या आधारे त्यांनी कसई धाटवाडी येथे अवैध दारू अड्ड्यावर छापा टाकला. यावेळी नऊ बिअरचे टीन, व्हिस्कीच्या एकूण ५७ बाटल्या अशी एकूण १० हजार पन्नास रुपयांचा गोवा बनावटीच्या मद्यसाठ्यासह १३ हजार ७०० रुपये रोख रक्कम हस्तगत केली. या प्रकरणी संशयित जानू कोळेकर व संतोष वडर यांच्यावर गुन्हा दाखल करण्यात आला. पोलिस निरीक्षक निसर्ग ओतारी, उपनिरीक्षक आशिष भगत, सहाय्यक फौजदार गवस, हवालदार सावंत, कॉन्स्टेबल वेंगुर्लेकर, चालक कांबळे यांनी कारवाई केली. पोलिस हवालदार गवस अधिक तपास करत आहेत.