कुसूरमध्ये शॉर्टसर्किटमुळे घराला आग लागुन हानी

88278

कुसूरमध्ये शॉर्टसर्किटमुळे
घराला आग लागुन हानी

लाखाचे नुकसान झाल्याचा अंदाज

सकाळ वृत्तसेवा
वैभववाडी, ता. ५ ः कुसूर खालची बौद्धवाडी येथील सुनीता नारायण कांबळे यांच्या घराला शॉटसर्किटमुळे आग लागली. हा घटना काल (ता.४) मध्यरात्री घडली. या आगीत सुमारे १ लाख रुपयांचे नुकसान झाले आहे. सुदैवाने इतर कोणतीही हानी झाली नाही.
याबाबत अधिक माहिती अशी की ः कुसूर खालची बौद्धवाडी येथे सुनीता कांबळे यांचे घर आहे. या घरात त्यांच्यासह त्यांच्या कुटुंबातील पाच माणसे राहतात. काल रात्री जेवण ओटपल्यानंतर हे कुटुंब झोपी गेले. दरम्यान, मध्यरात्री २ वाजण्याच्या सुमारास घराच्या काही भागाला शॉटसर्किटमुळे अचानक आग लागली. मात्र, गाढ झोपेत असलेल्या कांबळे कुटुंबियांनी आग लागल्याचे प्रथम समजले नाही. या आगीमुळे घराच्या शेजारी असलेल्या शेळ्यांच्या गोठ्यातून शेळ्या मोठ मोठ्याने ओरडू लागल्या. या आवाजाने कांबळे कुटुंबातील सदस्यांना जाग आली. त्यानंतर त्यांना घराला आग लागल्याचे समजले. घरातील लोकांनी बाहेर येऊन आरडाओरडा केल्यानंतर वाडीतील ग्रामस्थांनी घटनास्थळी धाव घेऊन आग अटोक्यात आणण्याचा प्रयत्न केला. ग्रामस्थांनी गोठ्यातील शेळ्यांना बाहेर काढले. तसेच शर्थीच्या प्रयत्नाने आग अटोक्यात आणली. या आगीत घराचा काही भाग जळाला. या घटनेची माहिती मिळताच तलाठी गणपत शिंदे यांनी आज घटनास्थळी जाऊन पंचनामा केला.