ही तर बदलाची सुरुवात

88351

ही तर बदलाची सुरुवात
अर्चना घारेः महाविकास आघाडीच्या यशावर प्रतिक्रिया
सकाळ वृत्तसेवा
सावंतवाडी, ता. ६ः महाविकास आघाडीचे महाराष्ट्रातील यश ही बदलाची सुरुवात आहे. महाविकास आघाडीचा विजय आमच्या कार्यकर्त्यांना बळ देणारा आहे, उत्साह वाढविणारा आहे, असे मत राष्ट्रवादी शरदचंद्र पवार गटाच्या कोकण विभागीय महिला अध्यक्ष अर्चना घारे यांनी व्यक्त केले.
लोकशाहीमध्ये निवडणुकीत जय-पराजय होतच असतो, यात नाराज होऊन संयम सोडायचा नसतो, असे सांगत रत्नागिरी-सिंधुदुर्ग लोकसभा मतदारसंघाच्या निवडणुकीमध्ये विनायक राऊत यांच्या पाठिशी राहिलेल्या सर्व मतदार, महाविकास आघाडी व सर्व कार्यकर्ते आणि पदाधिकारी, महिला यांचे सौ. घारे यांनी आभार व्यक्त केले. तसेच विजयी उमेदवार खासदार नारायण राणे यांचे देखील अभिनंदन केले.
सौ. घारे यांनी याबाबत पत्रक प्रसिद्धीस दिले, त्यात असे म्हटले की, रत्नागिरी-सिंधुदुर्ग लोकसभा मतदारसंघात आपल्याला अपेक्षित यश मिळू शकले नसले तरी, भविष्यात हे चित्र बदलण्याची ताकद आमच्या कार्यकर्त्यांमध्ये आहे. कुठलेही अपयश अंतिम नसते. अपयशाने खचून न जाता नव्या उत्साहाने, उमेदीने सर्व कार्यकर्त्यांनी पुन्हा एकदा स्वत:ला लोकसेवेला वाहून घ्यावे. सावंतवाडी विधानसभा मतदारसंघात महायुतीकडे दिग्गज नेते होते. मागील विधानसभा निवडणुकीतील पहिल्या दोन क्रमांकाचे मतदान घेणारे उमेदवार होते. मागील विधानसभेतील दोन्ही उमेदवारांच्या मतांची बेरीज जवळपास सव्वा लाख होत असताना फक्त ८५ हजार मते महायुतीला घेता आली.
सावंतवाडी विधानसभा मतदारसंघातील मतदारांनी श्री. राऊत यांना चांगली साथ दिली‌. राष्ट्रवादी काँग्रेस आणि महाविकास आघाडीच्या नेत्यांकडून या निकालाचे विश्लेषण केले जाईल. त्यांच्या निष्कर्षाप्रमाणे राष्ट्रवादी काँग्रेस आणि महाविकास आघाडीचे सर्व कार्यकर्ते चार महिन्यांनी होणाऱ्या विधानसभेच्या निवडणुकीसाठी कामाला लागतील, अशी भावना सौ. घारे परब यांनी व्यक्त केली आहे.