भाजप तालुकाध्यक्षांच्या गावात राऊतांना आघाडी

भाजप तालुकाध्यक्षांच्या गावात
विनायक राऊत यांना आघाडी

लोकसभा निवडणूक ; पोफळी पंचायत समिती गणातील चित्र

सकाळ वृत्तसेवा
चिपळूण, ता. ६ : रत्नागिरी-सिंधुदुर्ग लोकसभा निवडणुकीत पोफळी पंचायत समिती गणातून महाविकास आघाडीचे उमेदवार विनायक राऊत यांना तब्बल १ हजार ४५८ मतांचे मताधिक्य मिळाले. आकूस खाँ नगर येथील मतदान केंद्रावरून सर्वाधिक ४५१ मतांची आघाडी मिळाली. ही मते राऊत यांना पोफळी पंचायत समिती गणातून आघाडी मिळवून देण्यात महत्वाची ठरली आहेत. भाजप तालुकाध्यक्षांच्या गावातही महायुतीचे उमेदवार नारायण राणे मागे राहिले.
पोफळी पंचायत समिती गण हा नेहमी राष्ट्रवादी काँग्रेसचा बालेकिल्ला राहिला आहे. या गणात पोफळीसह शिरगाव, कुंभार्ली, कोंडफणसवणे ही गावे येतात. या गावातील बहुतांशी ग्रामपंचायतीवर अजित पवार गटाच्या राष्ट्रवादीचे वर्चस्व आहे. त्यामुळे भाजपच्या उमेदवाराला मते मिळवण्यासाठी या गणात अजित पवार यांच्या राष्ट्रवादीवर अवलंबून राहावे लागले. दुसरीकडे महाविकास आघाडीच्या कार्यकर्त्यांनी ग्राऊंड लेवलवर जाऊन काम केले. मशाल हे चिन्ह घरोघरी पोहचवण्याचे काम महाविकास आघाडीच्या कार्यकर्त्यांनी केले. त्यामुळे दोन्ही बाजूने निवडणूक कार्यकर्त्यांनी प्रतिष्ठेची केली होती. आकूस खाँ नगर येथील मतदारांनी आतापर्यंत कधीच राष्ट्रवादीची साथ सोडली नाही; मात्र या वेळी महाविकास आघाडीच्या पदाधिकाऱ्यांनी गावात सक्रिय असलेल्या कार्यकर्त्यांना हेरून त्यांची मने वळवली. त्यांना त्यांच्या मताचे मुल्य समजून सांगितले. त्यामुळे पोफळी पंचायत समिती गणातून सर्वाधिक ४५१ मतांची आघाडी विनायक राऊत यांना आकूस खाँ नगर येथून मिळाली. दुसरीकडे महायुतीच्या उमेदवाराला हक्काच्या १०० मतेही मिळवता आली नाही. भाजपचे तालुकाध्यक्ष वसंत ताम्हणकर कुंभार्ली गावचे आहेत. त्यांना आपल्या गावातून भाजपचे उमेदवार नारायण राणे यांना मताधिक्य देता आले नाही. कुंभार्लीत अजित पवारांच्या राष्ट्रवादीच्या मदतीने राणे यांना ३०७ मते मिळाली तर विनायक राऊत यांना तब्बल ६४४ मते मिळाली.
---------
राऊत यांना या गावात आघाडी
शिरगाव- ३१३
कुंभार्ली- ३३७
कोंडफणसवणे- ८२
पोफळी- ७२६
..................
कोट
पोफळी पंचायत समिती गणात महाविकास आघाडीच्या उमेदवाराला मतदारांनी चांगली साथ दिली. विधानसभा निवडणुकीतही अशी साथ मिळेल, अशी आशा आहे.

--राजा नारकर, विभागप्रमुख, पोफळी