महायुतीतील २ पक्षातील नेत्यांमध्ये रत्नागिरीत राडा

महायुतीमधील दोन नेत्यांमध्ये राडा

रत्नागिरी, ता. ६ : शहरातील विठ्ठलमंदिर परिसरात महायुतीतील दोन पक्षांतील नेत्यांमध्ये जोरदार राडा झाला. शिंदेगटाच्या शाखाप्रमुखाला भाजपच्या माजी नगरसेवकांकडून मारहाण करण्यात आल्याची तक्रार शहर पोलिस ठाण्यात दाखल झाली आहे. तक्रारीवरून माजी नगरसेवकासह त्याच्या भावावर शहर पोलिस ठाण्यात गुन्हा दाखल केला आहे.
शहरातील नवीन भाजीमार्केट परिसरात राहणारे शिंदेगटाचे शाखाप्रमुख मिलिंद देवरूखकर यांनी याबाबतची तक्रार दिली. देवरूखकर हे भाजपचे माजी नगरसेवक राजू तोडणकर व भाऊ परेश तोडणकर हे तिघे बोलत बसले होते. त्यांचा कोणत्यातरी कारणावरून वाद झाला. या वादाचे पर्यवसान हाणामारीत झाले अन् शाखाप्रमुख मिलिंद देवरूखकर यांना माजी नगरसेवक राजू तोडणकर व त्याचे बंधू परेश तोडणकर यांनी मारहाण केली. या घटनेनंतर मिलिंद देवरूखकर यांनी काल रात्री उशिरा शहर पोलिस ठाण्यात दाखल केली आहे. भाजपचे माजी नगरसेवक राजू तोडणकर व त्याचे भाऊ परेश तोडणकर यांच्या विरोधात शहर पोलिस ठाण्यात गुन्हा दाखल करण्यात आला आहे. याचा अधिक तपास पोलिस करत आहेत.