ओसरगाव टोलनाक्‍यावर ट्रकमधील कुलर चोरीस

ओसरगाव टोलनाक्‍यावर
ट्रकमधील कुलर चोरीस

सकाळ वृत्तसेवा
कणकवली, ता.८ : ओसरगाव टोलनाक्‍यावर उभ्या असलेल्‍या ट्रकमधून १५ हजाराचा कुलर चोरीला गेला. याबाबतची फिर्याद ट्रक चालकाने आज पोलिसांत दिली. ६ जून रोजी रात्री ११ ते सकाळी सात या दरम्‍यान ही घटना घडली आहे.
फिर्यादीत म्हटले आहे की, चालक बुधाजी भगवान नागोरे (वय ३८, रा.बीड) यांनी गोवा ते मुंबई या प्रवासादरम्‍यान ६ जून रोजी रात्री दहा वाजता ओसरगाव टोल नाक्‍यावर ट्रक (एमएच २३ एयू ५७२७) मुक्‍कामासाठी थांबवला होता. दुसऱ्या दिवशी सकाळी सात वाजता ते मुंबईच्या दिशेने गेले. नांदगाव तिठा येथे आल्‍यानंतर त्‍यांनी ट्रक थांबवून हौद्यामधील साहित्‍याची मोजणी केली. यावेळी एपीबी कंपनीचा कुलर त्यात नसल्‍याची बाब दिसून आली. त्‍यानंतर ट्रक चालक बुधाजी नागोरे याने ६ जून रोजी रात्री ११ ते सकाळी ७ या वेळेत पंधरा हजाराचा कुलर चोरीला गेल्‍याची फिर्याद दाखल केली. या प्रकरणी अनोळखी चोरट्याविरोधात गुन्हा दाखल केला असून अधिक तपास कणकवली पोलिस करत आहेत.