सावंतवाडीत २२ पासून योग जागरण शिबिर

सावंतवाडीत २२ पासून
योग जागरण शिबिर
सकाळ वृत्तसेवा
सावंतवाडी, ता. ११ः आंतरराष्ट्रीय योग दिनानिमित्त २२ ते २४ जून या कालावधीमध्ये तीन दिवशीय विनाशुल्क योग जागरण शिबिराचे आयोजन येथील पतंजली योग समिती, सावंतवाडी वैश्य समाज व तालुका पत्रकार संघाच्यावतीने आयोजित केले आहे. हे तीन दिवसीय शिबिर येथील शिवाजी चौक वैश्यभवन येथे सायंकाळी ६ ते ८ या वेळेमध्ये होणार आहे.
या शिबिरास योगशिक्षक विकास गोवेकर, दत्तात्रय निखार्गे व विद्याधर पाटणकर हे आरोग्य संवर्धनासाठी नित्यनेमाने कोणता योगाभ्यास करावा, यासंबंधी मार्गदर्शन करणार आहेत. या शिबिराचे उद्घाटन सिंधुदुर्ग जिल्हा पत्रकार संघाचे अध्यक्ष उमेश तोरस्कर यांच्या हस्ते होणार आहे. या कार्यक्रमास डिजिटल मीडियाचे जिल्हाप्रमुख अमोल टेंबकर, ज्येष्ठ पत्रकार अभिमन्यू लोंढे, माजी राज्य अध्यक्ष गजानन नाईक हे प्रमुख पाहुणे म्हणून उपस्थित राहणार आहेत. योग शिबिराचे उद्घाटन शनिवारी (ता. २२) सायंकाळी ५.३० वाजता होणार आहे. या शिबिरामध्ये रामनाथ सामंत, दत्तात्रय सडेकर, मीना सामंत, तानाजी वरक, रामजी परब व शरद कालेलकर हेही मार्गदर्शन करणार आहेत.
या शिबिरात आरोग्य संवर्धनासाठी नित्यनेमाने कोणता योगाभ्यास करावा, यासंबंधी मार्गदर्शन केले जाणार आहे. साधकाने शिबिरात येताना सैल कपडे परिधान करून व सोबत स्वतःला बसण्यासाठी जाजम आणावे. या शिबिरात महिला व नागरिकांनी मोठ्या प्रमाणात सहभाग घ्यावा, असे आवाहन पतंजली योग समितीचे महेश भाट, वैश्य समाज सावंतवाडीचे अध्यक्ष रमेश बोंद्रे आणि सावंतवाडी तालुका पत्रकार संघाचे अध्यक्ष हरिश्चंद्र पवार यांनी केले आहे.