सावंतवाडीत डास निर्मूलन मोहीम राबवा ः प्रांताधिकारी

सावंतवाडीत डास निर्मूलन
मोहीम राबवा ः प्रांताधिकारी

‘युवा रक्तदाता’ने वेधले लक्ष

सकाळ वृत्तसेवा
सावंतवाडी, ता. २ ः शहरवासीयांच्या आरोग्याशिवाय इतर काहीही महत्त्वाचे नाही. डास निर्मूलनासाठी आवश्यक मशिनरी आठ दिवसांत खरेदी करा, असे आदेश प्रशासक तथा उपविभागीय अधिकारी हेमंत निकम यांनी मुख्याधिकाऱ्यांना दिले. युवा रक्तदाता संघटनेचे अध्यक्ष देव्या सूर्याजी यांच्यासह युवकांनी प्रांत श्री. निकम यांची भेट घेत डासांचा वाढता उपद्रव व प्रशासनाकडून होणाऱ्या दिरंगाईबाबत लक्ष वेधले.
यावेळी निकम यांनी तत्काळ कार्यवाहीचे आदेश दिले.
शहरात वाढलेल्या डासांमुळे होणाऱ्या त्रासाबाबत लक्ष वेधूनही योग्य कार्यवाही होत नसल्याने सूर्याजी यांनी मुख्याधिकारी यांच्या कार्यालयात एक हजार मच्छर अगरबत्त्या लावणार असल्याचा इशारा दिला होता. यानंतर तत्काळ प्रतिबंधात्मक औषध फवारणीची मोहीम पालिका प्रशासनाने हाती घेतली; मात्र त्यानंतरही डासांचा प्रादुर्भाव वाढल्याने आज युवा रक्तदाता संघटनेने प्रशासक तथा उपविभागीय अधिकारी निकम यांची भेट घेत डासांच्या उपद्रवाबद्दल लक्ष वेधले. वाढत्या डासांमुळे डेंगी, मलेरियाची साथ पाहता तातडीने उपाययोजना करावी, अशी मागणी सूर्याजी यांनी केली. यावेळी अर्चित पोकळे, राघवेंद्र चितारी, सूरज मठकर, प्रथमेश प्रभू, अभी गवस, दिग्विजय मुरगोड, वसंत सावंत आदी उपस्थित होते.
---
रोगराई वाढणे योग्य नव्हे!
प्रांताधिकारी निकम यांनी मुख्याधिकाऱ्यांना तत्काळ कारवाईचे आदेश दिले. शहरात रोगराई वाढणे योग्य नाही. दिवसेंदिवस शहराचा आवाका वाढत आहे. अशावेळी दोन ऐवजी चार मशिनरी खरेदी करा, आठ दिवसांत डास निर्मूलन मोहीम हाती घ्या, प्रभावीपणे त्याची अंमलबजावणी करा, अशा सूचना मुख्याधिकारी सागर साळुंखे यांनी दिल्या.
94263