खेड तालुक्यातील ८३ प्राथमिक शाळा नादुरुस्त !

94308

खेड तालुक्यातील ८३ शाळा नादुरुस्त
निधीची कमतरता; शिरवलीचं शेरवली झालं आणि दुरुस्ती प्रलंबित
सकाळ वृत्तसेवा
खेड, ता. २ : तालुक्यातील शहरी आणि ग्रामीण भागातील जवळपास ८३ प्राथमिक शाळेच्या इमारती नादुरुस्त असल्यामुळे तेथील शिक्षक व विद्यार्थी जीव मुठीत घेऊन आहेत. जिल्हा परिषदेकडे गेल्या अनेक वर्षापासून शाळा दुरुस्तीचे प्रस्ताव धूळखात आहेत. त्यामुळे ग्रामस्थांमधून तीव्र नाराजी व्यक्त केली जात आहे.
काही दिवसांपूर्वी खेड तालुक्यातील कळंबणी केंद्रातील शिरवली शाळा पावसात कोसळली. सुदैवाने, शाळा सुटल्यानंतर हा गंभीर प्रकार घडला होता अन्यथा फार मोठा बाका प्रसंग शाळेतील विद्यार्थी आणि शिक्षकांवर ओढवला असता. शिरवलीप्रमाणे अनेक शाळा तालुक्यात आहेत. जिल्हा परिषद प्राथमिक शिक्षण विभागाने त्या शाळा वेळीच दुरुस्ती न केल्यास तिथे दुर्घटना घडण्याची शक्यता आहे. जिल्हा परिषदेने शिरवली नं. १ शाळा कोसळल्यामुळे जिल्ह्यातील सर्व गटविकास अधिकारी व गटशिक्षणाधिकारी यांना लेखी पत्र पाठवून स्वतःची जबाबदारी झटकली आहे. आपल्यावर शाळा कोसळल्याचा गंभीर आरोप येऊ नये म्हणून हा पत्रव्यवहार करण्याचा प्रयत्न जिल्हा परिषद शिक्षण विभागाने केलेला आहे.
जिल्हा परिषद बांधकाम विभागाचे खेड येथे उपविभाग कार्यालय आहे. येथे शिरवली शाळा नं. १ च्या दुरुस्तीसाठी आलेल्या निधीचा प्रस्ताव मंजूर होऊनही आलेला होता. तेथे नियुक्ती असलेल्या वरिष्ठ लिपिक यांनी हा प्रस्ताव शिरवली नं. १ च्या जागी शेरवली नं. १ असा बदल करून दिला. त्यामुळे शेरवली शाळेची दुरुस्ती पूर्ण झाली; पण शिरवली नं. १ मुसळधार पावसात कोसळली. हा बदलाचा प्रकार गंभीर असूनही जिल्हा परिषद मुख्य कार्यकारी अधिकारी यांनी या प्रकरणी कारवाई केलेली नाही, अशी नाराजी स्थानिक ग्रामस्थांनी व्यक्त केली आहे.