मणेरीत घरावर माड पडून नुकसान

मणेरीत घरावर माड पडून नुकसान
दोडामार्ग, ता. ६ : तालुक्याला आज मुसळधार पावसाने झोडपले. वाऱ्यासह पावसामुळे अनेक ठिकाणी झाडांची पडझड झली. मणेरी-कुबलवाडी येथील ऋतिक राजन सुतार यांच्या घरावर वादळी पावसामुळे माड कोसळला. सुदैवाने या दुर्घटनेत कोणीही जखमी झाले नाही; मात्र घराचे पत्रे, कौले, वासे यांचे नुकसान झाले. पावसाचे पाणी घरात शिरल्याने जीवनावश्यक साहित्याचेही नुकसान झाले.
दोडामार्ग तालुक्यात मागील चार दिवसांपासून मुसळधार पाऊस कोसळत आहे. आज सकाळपासूनच सोसाट्याचा वारा सुरू झाला. या वाऱ्यासहित झालेल्या पावसात मणेरी-कुबलवाडी येथे ऋतिक सुतार यांच्या घरावर मोठा माड कोसळला. यावेळी मोठा आवाज झाला. त्यामुळे घरातील मंडळींची भीतीने गाळण उडाली. माड घरावर पडल्याने पत्रे, कौले, वासे यांचे मोठे नुकसान झाले. पावसाचे पाणी फुटलेल्या छप्परातून घरात पडू लागले. त्यामुळे घरातील जीवनावश्यक सामानही भिजले.
या घटनेची माहिती उपसरपंच विशाल मोहन परब व सदस्य विजया महेश शिरंगेकर यांना मिळताच ते घटनास्थळी पोहोचले. पाऊस ओसरल्यानंतर माड तोडून बाजूला करण्यात आला. सुदैवाने या दुर्घटनेत कोणीही जखमी झाले नाही.
95250