ऑनलाईन फसवणूकप्रकरणी चौघांना न्यायालयीन कोठडी

ऑनलाईन फसवणूकप्रकरणी
चौघांना न्यायालयीन कोठडी

सकाळ वृत्तसेवा
कुडाळ, ता. ६ ः शेअर मार्केटच्या नावाखाली ऑनलाईन फसवणूक करणाऱ्या चौघा संशयितांना अटक करून सीबीआयने आज येथील न्यायालयात हजर केले. या चौघाही संशयितांना येथील प्रथम वर्ग न्याय दंडाधिकारी पी. आर. ढोरे यांनी न्यायालयीन कोठडी ठोठावली.
अधिक माहिती अशी, संशयित गिरीश पहवानी (रा. भिवंडी), लक्ष्मीकांत शर्मा (रा. मध्य प्रदेश), हेमंत अग्रवाल आणि स्वप्नील प्रजापती (रा. इंदोर) या चौघांविरोधात माणगाव येथील फिर्यादी अजय नारायण चव्हाण यांनी शेअर मार्केटमध्ये ऑनलाईन पैसे गुंतवून दाम दुप्पट रक्कम करण्याच्या आमिषाने फसवणूक केल्याची फिर्याद दिली होती. त्यानुसार या चौघांविरोधात गुन्हा दाखल केला होता. ही घटना २०१८ मध्ये घडली. त्यानंतर फिर्यादीने वारंवार विचारणा केली; मात्र संशयितांकडून प्रतिसाद मिळाला नाही. त्यामुळे २०२० मध्ये दिलेल्या तक्रारीनुसार गुन्हा दाखल केला होता. तेव्हापासून पोलिस संशयितांच्या शोधात होते. त्यानंतर हे प्रकरण सीबीआयकडे हस्तांतरित करण्यात आली. सीबीआयने विविध ठिकाणी तपास करून संशयितांच्या मुसक्या आवळल्या. प्रकरण कुडाळमधील असल्याने आज सायंकाळी चारही संशयितांना येथील न्यायालयात हजर करण्यात आले. सुनावणीअंती चौघांनाही न्यायालयीन कोठडी सुनावण्यात आली. संशयितांनी बारा ठिकाणी फसवणूक केल्याचे तपासात निष्पन्न झाले आहे.