मुसळधार पावसाने कणकवलीला झोडपले

मुसळधार पावसाने
कणकवलीला झोडपले
सकाळ वृत्तसेवा
कणकवली, ता. ७ : मृग नक्षत्रानंतर भातशेतीचा हंगाम सुरू झाला असून, आता शेतकऱ्यांना अतिवृष्टीमुळे अडचण निर्माण केली आहे. तालुक्यासह शहराला आज मुसळधार पावसाने अक्षरशः झोडपून काढले. त्यामुळे बहुतांश भागातील भात शेती पाण्याखाली गेली होती. गेल्या महिन्याभरापासून दमदार पावसाला सुरुवात झाली आहे; परंतु मुसळधार पाऊस फारसा झाला नव्हता. आज सकाळपासून तालुक्यातील विविध भागांमध्ये पावसाने दमदार हजेरी लावली. सकाळच्या सत्रात मंद गतीने पाऊस होता; मात्र दुपारनंतर मुसळधार पाऊस कोसळला. त्यामुळे तालुक्यातील बहुतांश रस्ते पाण्याखाली गेले होते. पावसाचा जोर असल्याने शेतशिवारांतही पाणी घुसले. त्यामुळे शेतकऱ्यांना कामे अर्धवट ठेवून घरी परतावे लागले. सह्याद्री पट्ट्यात आज सकाळपासून पावसाचा जोर होता. दुपारनंतर ठिकठिकाणी मुसळधार वृष्टी झाली. नदीनाल्यांना पूरसदृश पाणी आले होते. बहुतांशी नदी, नाले ओसंडून वाहू लागले होते. आज रविवार असल्याने बाजारपेठेत फारशी गर्दी नव्हती. वाहनांचीही रस्त्यावर वर्दळ नव्हती. पर्यटनासाठी फारशी गर्दी नव्हती. त्यामुळे पर्यटनस्थळांवर शुकशुकाट होता. धबधबे ओसंडून वाहू लागल्याने पर्यटकांनी पावसाळी पर्यटनाचा बेत रद्द केल्याचे चित्र होते.

९५३८०